Vawiin khan National Voters' Day (NVD) vawi 10-na chu Lawngtlai DC Conference Hall-ah Deputy District Election Officer, Lawngtlai Addl DC Pu K. Laltlawmlova, MCS hovin hman a ni.

Dy DEO chuan India ram chu mipui rorelna (democracy) ram niin, vote thlak chu khua leh tui dik takte chanvo leh mawhphurhna a ni, a ti a. Kumin NVD thupui chu "Electoral Literacy for Strong Democracy" tih a nih angin, mipuite'n zalen taka duh zawng kan thlan hi sawrkar tha siamna atan a pawimawh a ni tiin, vote nei chin tawh phawt chuan vote thlak zel turin a sawm.

He hun hi Election Officer Pu Lalremruata Sailo chuan a kaihruai a. Asst Electoral Registration Officer (AERO) Pu Hmingmawizuala kaihhruaiin NVD thu tiam sawi rual a ni a. Booth Level Officer (BLO) thawk tha thlan chhuahte hnenah chawimawina thilpek hlan niin, AERO Pu Vabeimozachhi Chozah chuan Chief Electoral Officer thuchah a chhiar chhuak bawk.

Best BLO chawimawina hlante chu - 36-Tuichawng bialah Pu Sunil Bikash Chakma, Mondirasora; 37-Lawngtlai West-ah Pu B. Lalmuana, College Veng South leh 38-Lawngtlai East-ah Pu Vanchhuma Chinzah, South Lungpher-I te an ni a. Electors Verification Programme (EVP)-a BLO thawk tha berah Pu Lalramlawma, 38/13-Chandmary North-I thlan a ni a, ani bakah hian mi pahnih hnenah pahnihna lawmman leh mi pathum dang hnenah pathumna lawmman hlan an ni bawk.

Vawiina Lawngtlaia NVD hmannaah hian official leh District Election staff-te, BLO-te, political party hrang hrang ai awhte, tlawmngai pawl ai awhte, chanchinbu mite leh Govt Lawngtlai College-a Political Science leh Public Administration zirlaite an kal khawm a ni.