Vawiin hian Serchhip DC Conference Hall ah National Voters' Day, 2020 hman a ni a. District Election Officer Dr. Lalzirmawia Chhangte, IAS chu khuallian a ni.

Khuallian chuan, India ram chu khawvela democracy ram lian ber, ram tam tak te entawn mek a ni a. Democracy lungphum chu ram mipuiten zalen taka ram hruaitu kan thlang thei thin hi a ni. Chutianga inthlanna thianghlim a awm theih nan chuan Election Commission in ruahmanna a kalpui a, Mizoram pawh Election Commission hnuaia inthlanna boruak nuam leh entawn tlak buatsaih thin leh state dangte entawn ni phakin kan hmingtha nghe nghe a ni, a ti a. State dangte entawn tlaka kan awm zel theih a pawimawh hle thu a sawi nghe nghe. Dr. Lalzirmawia Chhangte chuan, Booth Level Officer te chu khua leh tui dik tak te chauh Roll a an chuan theih nan an pawimawh hle tih sawiin, Roll a hming chuang, vote thlak nachang hre lote vote thlak thin tura zirtir uar a tul thute pawh a tarlang a ni.

Serchhip District chhung a Election lama thawk tha thlanchhuah te puangin, ‘Best Sectoral Magistrate ah Pu K Laltlanmawia, Subject Matter Specialist (SMS) Agri Department Serchhip leh Best Flying Squad Leader ah Pi Zonuntluangi, District Fisheries Officer te chu thlan an ni a. Serchhip District chhunga vote tlak tam berna chu Buhkang Kawn Polling Station niin ‘Best Polling Parties’ ah Serchhip IX a Polling Party duty te thlan an ni bawk.

Vawiin hi “National Voter’s Day Vawi 10-na’ pual inkhawmah hian nikum September Ni 1 atanga November Ni 30 chung a Electoral Verification Programme (EVP) kalpui zawh taka Serchhip District chhunga BLO titha zual thlan chhuah te chu :

1-na Pu H Thangnghinglova,Headmaster Buangpui M/S, 2-na Pu Lalbiaksiama,Teacher Chekawn M/S & Pu R Lalmuansanga,Teacher Khawbel M/S, 3-na Pu T Lalengliana, Teacher, Leng H/S, Pu T Kaphnuna, Teacher,Chhiahtlang M/S II leh Pu Vanlalruata,Teacher, Eklavya Residential School Serchhip te an ni.

Kumin National Voters' Day thupui hi 'Electoral Literacy for stronger democracy' tih hman a ni a, Systematic Voters Education and Electoral Participation(SVEEP) hnuaia Electoral Literacy Club(ELC) Programme kalpui mekah Brilliant Higher Secondary School ,New Serchhip a zirlai naupangte nen hun hman ho a ni bawk.

He hun hi Pu Vanlalhmachhuana, Election Officer chuan a kaihruaia. Pi Lalchharliani, LDC, Election Branch kaihhruaiin kal khawm ten Voter Day thutiam an sawi rual a ni.