Election Commision of India-in Electoral Roll dik, thianghlim leh felfai a awm theihna tura National Electoral Roll Purification 2016 (NERP) chu India rampui a kalpui tura ruahmana a siam angin vawiin khan Champhai District-ah pawh Champhai DEO Pu Vanlalngaihsaka IAS, Champhai DC ni bawk hovin DC Conference Hall-ah a hawnna hun hman a ni.
Hun kaihruaitu DEO chuan Electoral Roll thianghlim leh felfai neih a nih theih nan hian District, Constituency, Polling Station tinah Working Group din a nih thu a tarlang a ni.
Election Officer Pu K Lalhmuakliana pawhin thu sawiin, uluk taka Electoral Roll kan siam hi fello leh dik lo palh te awm thei anih thin avangin Roll felfai leh thianghlim zawk kan neih theih nan theih tawp chhuah tlan a pawimawh thu a sawi. April thla atangin NERP hi kalpui tan tura ruahman niin, kumin August thla chhunga zawhfel hman ngei ngei tur a nih thu a sawi bawk.
He hunah hian Party hrang hrangte pawhin Electoral Roll felfai tak neih anih theih nana rawtna an neih te sawiho a ni a. NERP hawnna hunah hian ERO, AERO te bakah officials te leh tlawmngai pawl leh media aiawhte an tel a ni.
