Vawiin khan Awithangpa Hall Kawnpui-ah Agriculture Department hnuaia NLUP 3rd leh 4th Phase a, oil palm chingtu mi 189 hnenah NLUP tanpuina sum cheng 10,000 theuh a hmun an thlawh faina turin pek an ni a. NLUP semna programme hi Parliamentary Secretary Pu Hmingdailova Khiangte'an a hmanpui a ni.

Pu Hmingdailova Khiangte chuan NLUP beneficiaries ten NLUP hlutzia an hriatthiama NLUP hi an hlut a pawimawh thusawiin nuai khat lai tanpuina sum, intodelh nan leh eizawnna nghelnghet an neih theih nan Sawrkarin mipuite a buatsaih hi hmun dangah leh ram dangah sawi tur a awm mang lo a ni, a ti a. Tunah NLUP tanpuina an dawn hi a hmunhma leh lo vahna tura pek an nih angin lo an vah hunah meikawng te sial tha turin leh a tul lova ram a kan loh nan theitawpa tan la a fimkhur turin a chah a. Tanpuina sum an dawn hi a hmanna tur dik taka hmang turin a chah bawk a ni.

NLUP semna programme kaihruaitu District Agriculture Officer Pu R. Lalnunzira chuan NLUP dawngtu te chu tanpuina an hmang dik em tih finfiahna kawnga tan an lak leh zual tur thusawiin tanpuina hi dik taka hmang turin a dawngtute a chah a ni.

Kolasib District-ah hian NLUP 3rd leh 4th Phase ah, Agriculture Department chuan beneficiaries 955 an nei mek a(3rd Phase ah 640; 4th Phase ah 315). 1st Phase a beneficaries 388 leh 2nd Phase a beneficaries 423 te hian tanpuina an dawn tur ang an dawngkim tawh a ni. Agriculture Department hnuaia Trade te hi - WRC I, WRC II, Oil Palm leh Fu chin te a ni.