Vawiin chawhnu dar 1:00 khan Khawlailung BNRGSK Hall-ah Sansad Aadarsh Gram Yojana (MP Model Vilage) hmachhawp tihhlawhtlinna peng pakhat atan General Insurance Company, Mumbai in Corporate Social Responsibility kaltlanga ruahmanna a siam "Sustainability Livelihood for Small & Marginal Farmers Project" hnuaia tanpuina dawngtute hnenah tanpuina sum hmasa (first instalment) a ni a, District Bawrhsap Dr. Lalrozama, IAS chuan hmanpuiin tanpuina hi a sem a ni.

Bawrhsap chuan kalkhawmte hma ah thu sawiin tanpuina an dawn chu thil danglam bik, Sawrkar budget pawn lam thil, Private Company te atanga tanpuina hmuh anih avangin midangte pawhin an ngaihven bik dawn ani tih hre turin a chah a, sawrkar atanga sum dawn nen a kalphung a danglam dawn a, min vil uluk dawn bawk a, kan thawh that loh chuan an duh hun hunah tanpuina hi an ti tawp mai dawn a,an lungawi chuan tun ami bak hi thildang tam tak min tihbelh sak thei bawk a, chuvang chuan inthlahdah lova kan tan mar pat a tul a ni a ti a, beneficiary te chu fuihin anmahni tan mai bakah an hnu leh zela beneficiary dang an awm theihna tura kawng sialtu an ni tih inhre reng tura chah in amah ngei pawn uluk taka a vil zui reng tur thu a hrilh a ni.

Khawlailung Village Council President Pu Thangbawia pawhin thu sawiin Model Village atana thlangtu Lok Sabha MP Pu CL Ruala, Bialtu MLA Pi Vanlalawmpuii Chawngthu leh Sawrkar hotute chungah lawmthu a sawi a, beneficiary te pawh khawtlang tana hriak thih an ni tih hre tur leh khawtlang hmel lanna pawimawh tak an ni tih in hre turin a chah a, hotute kaihhruaina zawm tha a taima leh rinawm taka dikna nen tang tlat tura hrilh in anmahni duhsaktute thinlung ti na tu nilo turin a chah bawk a ni.

Inkhawm kaihruaitu, DRDA Project Officer, Khawlailung Model Village a Charge Officer ni bawk Pi Teresy Vanlalhruaii pawhin Corporate Social Responsibility kaltlanga tanpuina an hmuh theih dan leh a kalphung te a sawifiah a, beneficiary te pawh anmahni thlan an nih chhan inhre tur leh anmahni ah beisei an nei ani tih in hrechiang a an beiseina te tihlawhtling ngei turin a chah a ni.

"Sustainability Livelihood for Small & Marginal Farmers Project" hnuaia General Insurance Company in sum hmahruai Rs nuai 12.5 Khawlailung tana a pek atangin he project hnuaiah hian Rs nuai 6 dah a ni a, beneficiary 10 awmin an ni hian hmalakna tura an duh trade hrang hrang an thlang a, beneficiary tin te hian Rs 60,000/- theuh an dawng dawn a, an dawn tur atanga a hmasa ber 1st instalment chu vawiin hian sem niin District Bawrhsap in beneficiary te hnenah a hlan a, tanpuina dawngtu beneficiary te chu :

1) C. Ropianga (WRC) Rs. 20,000/-

2) C. Lawmruala (Tailoring) Rs. 30,000/-

3) C. Lalzarliana (Orange Plantation) Rs. 20,000/-

4) Lalruatkima (Carpentry) Rs. 20,000/-

5) Lalthlengliana (Orange Plantation) Rs. 20,000/-

6) Thawmliani (Fu Her Khawl) Rs. 15,000/-

7) Lallawmzuala (Fu Her Khawl) Rs. 15,000/-

8) Jesse Lalruatkima (Petty Trade) Rs. 20,000/-

9) Lalremmawia (Piggery) Rs. 15,000/-

10) Nikungi (Piggery) Rs. 15,000/-

Vawiina tanpuina sum sem zawng zawng hi a vaiin Rs 1,90,000/- a ni a, beneficiary te hmalak tumdan leh an hmunhma neih dan azirin first instalment sum pek an nih dan a in ang lova, an sum hmuh atanga an hmalak tur chin ruahman sak te an thawh zawh huna endik anih hnu ah second instalment hi pekchhuah leh a ni ang a, beneficiary te hian a vaiin Rs. 60,000/- theuh an dawng dawn a ni. Beneficiary tin hi Village Council ten chan insem in an hmalakna te an vil zui dawn bawk a ni.

Vawiin chawhma dar 9:30 khan Rajya Sabha MP Pu Ronald Sapa Tlau-in Model Village a siam tura a thlan Chhiahtlangah hetiang tanpuina semna hun hi buatsaih a ni tawh bawk a ni.