Swachh Bharat Mission (Gramin) hnuaia ram pum huapa faina chungchang inhrilhhriatna -  National-Wide Sanitation Awareness Campaign chu Champhai district-ah pawh thla khat chhung kalpui a nih hnuin vawiin khan a kharna hun Kahrawt YMA Hall-ah hman a ni a. He hun hi Er Zohmingliana, EE PHE Deptt, Champhai WATSAN Division chuan kaihhruaiin, Pu Lalrammawia, SE, PHE Deptt chu khuallian a ni.

Pu Lalrammawia chuan thu sawiin,  awareness campaign a zawh chiah hian a tak kan hmachhawn dawn tihna a ni a ti a. Thla khat chhung daih Awareness Campaign nei hian PHE Department chuan theihtawp a chhuah a, a hlawhtlinna erawh chu mipui kutah a innghat tawh a ni, a ti a. Faina hian lang thei hriselna mai bakah kan rilru lam hriselna pawh a keng tel a, mihring nun a kan neih ngei ngei tur thil pawimawh tak pakhat a ni, a ti a ni.

Thu sawitu dang Pu Lalhmingmawia Pachuau, President, MJA Champhai District chuan faina kawng PHE Deptt hmalakna chuan lawmawm tiin, thla khat chhunga PHE Department thawk tuten awareness campaign hnuaia Champhai District pum an tuam chhuak hman chu lawmawm a tih thu a sawi a. Faina lama hma kan sawn dan ngaihtuah hian Mizoram hi ram changkang zawkte tlawh atana iaiawm loh turah kan siam thei thuai dawn a ni, a ti. He hunah hian Pu VL Chama Hnamte, Sub-Hqrs YMA President pawhin faina kawnga YMA in hma a lak dante a tarlang ve bawk.

Inkhawm kaihhruaitu Er Zohmingliana chuan awarness campaign neih dan tlangpui report pein, Swachh Bharat hi hlawm hniha then a ni a, khawpui lam chu UD&PA Deptt in an tuam a, PHE Deptt in thingtlang lam an mawh ve thung a. Thingtlang khaw hrang hrangah faina lam inzirtirna neih a nih bakah, Global Hand Washing Day pawh kalpui a ni a, veng chhung chanchinbu hrang hrangah faina lam inzirtirna tihchhuah a ni, a ti a. National wide Sanitation Awareness Campaign neih chhung hian Champhai District khaw hrang hrangte chu inthiarna in changtlung nei veka siam tum niin, hemi atan hian khaw 139-ah inthiarna in 30 siam a ni a. PHE Deptt hian inthiarna in siam kawngah hian DRDA chu thawhpuiin MGNREGA tanpuina hmangin hna thenkhat chu thawh a ni a. Hei hi Mizoram District zinga Champhai District chu District fai ber a nih theihna tura hmalakna chi khat niin, inthiarna tur siam kawnga achievement hi  Mizoramah Champhai District chauh hi a nei awmchhun kan ni, a ti.

National-Wide Sanitation Awareness Campaign hi Champhai District-a block hrang hrangah pawh vawiin khan a kharna hun hi hman a ni.