Mizoram hmun dang rualin vawiin khan in tina electric eng pekna tur Pradhan Mantri Sahaj Bijli Har Ghar Yojana, Saubhagya Scheme chu Champhai Venglai Community Hall-ah Pu Vanlalngaihsaka, Champhai DC chuan a hawng.
Hawnna inkhawm hi Pu Lalrinmawia, SE, Champhai Power Circle chuan a kaihhruai a. Khuallian Pu Vanlalngaihsaka, Champhai DC chuan cheng vaibelchhe 16320 senna tur Pradhan Mantri Sahaj Bijli Har Ghar Yojana, Saubhagya hi nikum September ni 25 khan India Prime Minister Narendra Modi chuan a hawng a. He scheme hnuaia hian kum 2018 December thla hma ngeiin India rama in awm tawhna zawng zawngin eng an nei vek tur a ni a. Thingtlang mi nuai 400 te chuan electic eng an neih theih phah dawn a ni, tiin tun dinhmuah chuan India ramah thingtlang leh khawpuia cheng chhungkaw nuai 50 ten elect an la nei lo anga chhut a ni, a ti. He project hi Mizoram pawhin ram hmasawnna atan thil tangkai tak a nih dawn bakah mi harsa zualte tan thil chhenfakawm tak a nih dawn avangin nikum november thla khan central sorkar hnenah tihhlawhtlin a tumna, Letter of Intent a lo thawn tawh a, tunah district wise Detail Project Report buatsaih mek niin, data tul ang te khawn khawm mek a nih thu a sawi tel bawk.
DC chuan, he project hlawhltinna atan a changtu P&E Dept kuta dah mai a tawk dawn lova, khawtlang hruaitu leh tlawmngai pawlte thawhpuina a mamawh hle dawn a ni, a ti a, hmalakna vil zui kawngah District administation chelhtute nena thawhho that pawh a tul hle dawn a ni, tiin, Champhai District-in Saubhagya Scheme hi tangkai taka a hman theihna turin a hawng a ni.
Saubhagya Scheme chungchang hi Pu R.Romawia, Sr Executive Engineer, Khawzawl Power Division chuan a sawifiah a. He scheme hian awlsam zawka electric connection pek te, chhungkaw khawsak harsa zualte hnena a thlawna electric connection pek te, inkalpawhna tha neilo khua hnenah ni eng chakna hmanga tlectric pek te chu a thil tum a ni, tiin, Saubaghya Scheme hi Sociao Economic Caste census 2011 data atanga chhutin a thlawna electric connection dawng thei leh thei lote chu stage thuma then an nih thu a tarlang a. Stage 1-a mite chuan he scheme kaltlang hian cheng 500 chawiin electic connection an nei thei dawn a. Stage 2 leh 3-a mite chuan electric eng la nei lo chhungkaw tan a thlawna connection neih theih a nih tur thu leh, heng stage hrang hrangin a huam chin te a sawifiah a. Hetihlai hian DDUGJY Shceme hnuaia a thlawna electric connection nei thei zinga telh loh BPL chhungkaw tan a thlawnin electric connection hi a lak theih tur thu te leh he scheme kalpui dan tur hrang hrangte a tarlang bawk a ni.
Vawiina Saubhagya hawnna inkhawm hi Pu Thanglura Sailo, EE, Power Project Division, Champhai chuan lawmthu a sawiin a khar a. Sorkar hnathawk, tlawmngai pawl leh veng hrang hrang VC te an tel a ni.
