Vawiin chawhma dar 11 khan Govt. Champhai College ah MLA General Election 2013 awm tura Champhai District A/c 5 huamchhunga Presiding Officer te tan Training buatsaih a ni.
He hunah hian Addl. DC Pu Zoengsanga 21-Lengteng A/c leh 22-Tuichang A/c Returning Officer ni bawk chuan, vawiin Training a kalkhawm Presiding Officer te chu Election a mi pawimawh berte zing ami an ni ati a, an hna uluk tura fuih bawkin, Addl. DC chuan, Presiding Officer te chu Representation of the People Act, 1951 Section in 28A in a sawi angin, Election Commission thuneihna leh tihtur a tih apiang ti tura deputation a kal ang an ni ati a, Presiding Officer an nih angin anmahni Polling Station chhungah chuan dan leh thupek kenkawh leh inthlanna mumal leh muanawm tak a awm theihna tura thuneihna pumhlum nei an ni a ti a, inthlahdah leh namnul taka thil ti an awm chuan an chungah dan ang taka action lak a nih tur thu a sawi a, vote chhiar tur fel tak kan neih theihna tura hna uluk turin a chah bawk a ni. Election Commission in thu leh hla a neih zawng zawng kan hrechiang em em tur a ni tih sawiin, sawisel theihloh turin an thil hriatna kawngah chuan an inthuam famkim tur ani tiin kalkhawmte a chah a, training hlawk taka hmang turin duhsakna a hlan nghal bawk a ni.
Vawiin training hi hmun thum (3) a then a ni a, heng room ah te hian Resource Persons te hian a chhawkin zirtirna an pe a, Pu Alan Lalthanzara MCS, SDC Champhai chuan instructions on EVM Management tih hmangin zirtirna a pe a, Pi Rochuangkimi Khenglawt MCS, SDC Champhai leh Zoremthara Ralte MCS, BDO Champhai te chuan Duties & Responsibilities of Polling Personel & Impts. Forms tih thupui hmanga zirtirna pe bawkin K. Lalngaihzuala Asst. Engineer NIC Champhai chuan SMS based Monitoring tih thupui hmangin zirtirna a pe bawk a ni.
Vawiin training hi Presiding Officer te tana buatsih niin naktuk hian Asst. Presiding Officer te training pek leh an ni ang. Champhai District A/c 5 huamchhungah hian Presiding Officer 166 awmin, heng zinga 133 te hi duty a chhuak tur an ni a, a bak 33 te hi reserve an ni. Vawiin training ah hian Election Observer te pawhin a hmunah an tlawh bawk a ni
