Lunglei District chhunga postal ballot dil duh leh thlak duhte tan November ni 12, 2013 atang khan Election Office, Lunglei-ah ruahmanna siam tan a ni tawh a. Nimin tlai thleng pawhin Voter mahni bial-a awm lo emaw hna avanga mahni bial chhunga awm thei lote emaw chuan postal ballot thlak dilna an thehlut zel bakah vote thlak hun an rawn hmang zel a ni. Postal Ballot thlakna hi darkar ni 24 (24x7) chhunga hawn a ni a. Postal ballot hmang hian sawrkar hna emaw hna dang emaw thawh vanga Lungleia awm, Mizoram State Election ruala anmahni awmna State inthlang ve tur ten, anmahni awmna State Assembly Constituency-a Candidate-te an vote ve theihna a ni nghal a, hetianga vote thlak duh tan Lunglei Election Office-ah postal ballot hmanga vote thlak theihna tur hi ruahman sak an ni bawk.

Election Commission of India leh Mizoram Election Office ten thutlukna an siam bawhzuiin Lunglei District chhunga Tripura Camp Bru voter-ten postal ballot an thlak theihna tur kengin ARO 3 - Pu David Lalrinawma, BDO Lunglen, Pu Lalhmachhuana SDC Lunglei leh Pu K.Lalnuntluanga, BDO Lunglei - hovin vawiin khan polling party ten an duty-na tur polling station theuh an pan a ni. Lunglei District huamchhungah hian Lunglei South bialah Tripura Bru vote awmna polling station 2 (Naisingpara leh Hazacherra); Thorang Bial-ah 3 (Naisingpara, Hazacherra leh Khakchangpara) leh West Tuipui Bial chhunga 3 (Naisingpara, Hazacherra leh Khakchangpara) te a awm a ni. Lunglei leh Thorang Bial RO chu Pu Joseph Lalramsanga a ni a, West Tuipui Bial RO chu Pu Donny Ruatsanga a ni thung.