India Republic Day vawi 62 na chu India ram hmun hrang hrang leh Mizoram District tina hman rualin Champhai-ah pawh vawiin 26 January, 2012 hian Champhai District Bawrhsap Pu Vijay Kumar Bidhuri IAS hovin Champhai Chhangphut Field ah chawhma dar 10:30 khan Champhai khawchhunga sorkar official, NGO, Party hruaitu, sikul naupang leh mipui thahnem takte nen hman ho a ni.

Kum 2012 Republic Day Champhai a lawmna ah hian Khuallian Pu Vijay Kumar Bidhuri chuan Hnam Puanzar a pawhparh hnuin Parade contingents 18 te chu an awmna hmunah a tlawh kual nghal a ni. Kumin Republic Day hmanna ah hian March Past zingah sikul naupang - 13, NCC - 3, Mizoram Police - 1, ex-Servicemen - 1 leh SSA Pipe Band - 1 te nen an vaiin 19 contingents an awm a ni.

Khuallian, Champhai District Deputy Commissioner Pu Vijay Kumar Bidhuri chuan thu sawiin, sorkar hmasawnna tur a duan mekah hian kan District Champhai pawh hi a tuam mek a. Ni za inhlawhna (MGNREGS) pawh kum 2011 - 2012 chhung hian Ni 100 kan inhlawh thei ngei dawn a, BNRGSK building pawh khaw tam takah sak zawh tawh a ni a. PYKKA Mizoram pum huapa vawi thum neih tawhah kan District hi a zawnin kan champion vek a, overall champion vawi 3 kan ni tawh a ni, a ti.

Mipuite harsatna sukiang tura buatsaih District Grievance Redressal Cell leh lehkhabu siam a ni a, he lehkhabu ah hian mipuiten harsatna an neih huna biakpawh turte Phone No. an nihna leh an hnathawhte tarlan a ni a, khawtin V/C leh office tinah sem a ni a, hei hi hmang tangkai vek turin mipuite chu a chah a. Mihring hriselna atana a that loh em avangin zuk leh hmuam khapna Dan thar (COPTA) hi khauh taka kenkawh mek a ni a, office, puipunna hmun, Damdawiin In etc. ah te meizial zuk khap tlat a ni, a ti.

Khuallian chuan ramkang hi kan ram hmelma a ni a, kumtin ramkang avang hian ram zau tak tih chhiat a ni a, mitinte kangmei ven thuah tanla tur leh kangmei tichhuak lo tura fimkhur turin a ngen a. Socio-Economics Census neih mek a ni a, Champhai District ah pawh February ni 3 ah tan tur a ni a. Chhiarpui ah hian mitin in kan nihna leh dinhmun an rawn zawh apiang dik taka lo chhan nisela. He Chhiarpui hi kan sakhuana, kan rinna nen inkaihhnawihna engmah a awm lo tih a sawi a ni.

Bawrhsap chuan February ni 23, 2012 hian khawtin roreltu tur V/C inthlanna neih turah hian mipuiten kan duhthlanna dik tak hmangin kan hotu tur thlan tur a ni a. Inthlan kaihhruaina dan te pawh tumahin bawhchhe lo ila, V/C inthlan chuh tumte pawhin Model Code of Conduct zawm theuh turin a ngen a. Champhai District chhungah inthiarna lama hma kan sawn mek thu sawiin, Ekin (Comode) la nei lo te hnenah sem vek tawh a ni a, hemi kawnga hma kan lak that avang hian kan District chuan Nirmal Gram Purushkar Award kan dawng dawn a ni, a ti.

State hnufual khaichhuah nana NLUP chak taka kalpui mekah eizawnna ngelnghet kan neih theih nan mipuiten lo dawngsawng thiam a, kan inkhaichhuahna tur a ni tih hriain taima tak leh rinawm taka thawk turin DC chuan mipuite a ngen a ni.

Vawiin Republic Day ah hian Naupang Huaisen Joseph Khualzakama s/o Thanglammanga Suante, Ngur khua ni 4.12.2011 a a thianpa electric in a man chhanchhuaktu chu chawimawina hlan a ni a, Republic Day pual hian infiamna chi hrang hrang - Football, Volleyball (Men & Women), Badminton, basketball, Table Tennis leh Tug of War te neih a ni a. March Past ah 1 na Govt. GM High School (Girls), 2 nd Govt. Champhai High School (Girls) leh 3 na B.C.  Academy (Girls) te an ni.

Chhun lamah Jericho, Keifangtlang-ah DC buatsaihin Republic Day lawmna thingpui ruai buatsaih a ni.