India Republic Day vawi 63-na chu vawiin khan Mamit khelmual ah ropui takin lawm a ni a. Khuallian Pu Rodney L. Ralte, IAS, District Bawrhsap chuan zing dar 10.00 ah India Hnam puanzar pawtpharhin Parade Contingents 9 te hnam puanzar chibai buk a chhang let a ni.

Khuallian chuan thusawiin, India ram mahni kut leh ke ngei a ro kan inrel tan na ni kan lawmnaah hian ram hruaitu ropui mual liam ta te - India Hnam Pa Mahatma Gandhi, Pandit Jawaharlal Nehru, Sardar Valabhai Natel leh midangte inpekna leh thawhrimna hi kan hre reng a, kan zahin kan chawimawi a ni a ti a. Ram tana mi inpe te leh thawhrimna avangin India chu khawvel ram ropui ber dinhmunah a lo ding ta hial a ni tiin India Hnam Pa Mahatma Gandhi chuan \"India ram chu pangpar huan mawi tak ang a ni\" a lo ti hial a. A chhan chu India ramah hian hnam hrang hrang te leh sakhaw hrang hrang vuan tute lungrual taka kan khawsak theihna avang a ni a ti bawk. Khuallian chuan Mizoram sorkar hruaitute inpekna leh thawhrimna a zarah Mamit District pawhin kawng tinrengah hma a sawn chho ve zel a ni tiin, District hmasawnna hrang hrang te a tarlang a. Ei leh bar kan zawnna kawngah Agriculture Department hnuaiah khaw 27 a lo neitute, 439 hnenah Oil Palm tiak 60,114 sem chhuah a nih thu te, kumin chhunga buh thar chhuah 5,162 metric tones beisei a nih thu te a tarlang a, DRDA hnuaia ni 100(za) inhlawhna NREGS hmangin chhungkaw 18,179 te hnenah tun dinhmunah ni 65 inhlawhna pek vek a nih tawh thu te, Hmeithai insak (IAY) tanpuina hmanga chhungkaw 432 te in sak sak a nih tawh thu te a tarlang a. Heng bakah hian zirna lam sawiin Darlak, Mamit leh Rajiv Nagar ah High School pathum(3) sak a nih thu te a sawi a ni.

Hriselna lama hmasawnna tarlangin Revised National Control Programme hnuaiah Multi Drugs Resistant (MDR) T.B. vei te tan a thlawnin Rs. 2,00,000 (cheng nuai hnih) chuang man District ah dawn a nih thu te leh, District Blindness Control Society in chak zawka hma a lak theih nan Mobile Van thar Rs. 12,00,000 (cheng nuai sawmpahnih) man neih thar a nih thu te a tarlang a ni.

Kawng lama hmasawnna sawiin - Mamit to Bairabi inkar kawng thawm that hnathawh mek chu kum 2012 chhung hian zawh hman theih a nih beisei a nih thu a sawi lang bawk a ni.

Khuallian chuan NLUP hmanga mirethei khai chhuahna tur programme duanah kum 2011-12 ah 2nd Phase atan Mamit District chhungah chhungkaw 3950 te hnenah pek leh tum anih thu a tarlang bawk a ni.

Parade Contingent pakua (9) te zingah 1st na, Govt. Mamit High School (Girls) niin 2nd na, St. Francis of Assisi High School niin 3rd-na chu Govt. Mamit H/S (Boys) an ni.

Vawiin Republic Day lawmna-ah hian District chhunga infiamna lam ti tha te, National Level a Gold, Silver leh Bronze Medalist te mi 13 te leh State Level a Gold Medalist mi 26 te hnenah lawmpuina hlan an ni a. Lawmmante hi khuallian in a sem a ni.

Republic Day lawmna neih zawh hian khuallian chuan Mamit Damdawi In tlawhin damlo 13 awm mekte hnenah thilpek a hlan a ni. Sawm bikte tan Tourist Lodge-ah VIP at Home buatsaih a ni bawk

Republic Day, 2012 lawmna hun ah hian officials leh mipuite an tel tha hle a ni.

Attachment

  • Loading attachment...