Transport Minister Pu P.C. Zoram Sangliana sorkar hna pawimawh thawka Kolkata a a cham chhungin Force Motor Ltd. aiawh ten an Motor/Bus che Salt Lake, Mizoram House ah Minister an entir a. Aizawl khawpui kawng chep tak sia City Bus leh City Line Bus atan leh JNNURM atanga 2nd Instalment Bus hmuh leh tur atan a tih chi ang em tiin Minister hian uluk takin company aiawhte nen an thlir a. Force Motors hi sitting capacity 17 plus driver thut theihna, tun hmaa Bajaj Tempo ltd. ni thin kum 2006 atanga Force Motors tia thlak tak a ni a, Minister hi PAC a kal mek MLA te Pu R. Lalrinawma, Pu K. Lalrinthanga leh Dy. Chief Whip Pu R.L. Pianmawia ten an enpui bawk a ni.

Minister hi Pu K.K. Benerjee, Director, Raja Rammohan Roy Library Foundation, Ministry of Culture, Govt. of India, Kolkata nen inkawmna hun tha tak Mizoram House Salt Lake ah 12:20 - 1:30 pm an nei a. District hrang hranga Library tih changtlun nana hmalak dan kawng hrang hrang an sawi dun a. Pu K.K. Benerjee pawh a in phal zau hle a, tunah hian District Library neihsa leh District danga hmalak chhunzawm nghal an nih tur thu a hrilh a, Rural Library tih changtlun nan Pu K.K. Benerjee chuan Mizoram State sorkar-in a theih dawn chuan 10% a tum anga, 90% chu Raja Rammohan Roy Library Foundation in an tum ang tiin a hrilh a, hemi chungchangah hian proposal 32 Libraries 2012 - 2013 atan siam turin Pu K.K. Benerjee chuan Pu P.C. Zoram Sangliana chu a hrilh a ni. Tun Chapchar Kut denchhena Library Exhibition-cum-Book Fair neih a rawtna pawh Pu Benerjee chuan tha tiin proposal thehlut turin a rawn a ni.

Hemi tlai vek hian Art & Culture Minister hi Pu Anup Matilal, Director, Indian Museum, Kolkata nen inkawmna hun tha tak Mizoram House, Salt Lake ah nei lehin Mizoram State Meseum tih changtlun na tur kawng hrang hrang an sawi dun a. Minister hian proposal siamin tun February chawlhkar hnihna lo awm turah High School naupangte tan Heritage Tour neih chhunzawm leh dan tur a sawipui bawk. Museum tih changtlun nan mahni hnam zia pholan theihna (Diorama) siam turin hmalak dan tur an sawi bawk a. Minister hian State Museum tih changtlun dan kawng hrang a sawipui a, chung zingah chuan Museum Computerised dan tur a tel a, Pu Anup K. Matilal chuan proposal thehlut thuai turin a ti bawk a ni.