Vawiin chawhma dar 10:00 khan India ram hmun dang ang bawk in Lunglawn mual, Lunglei ah Republic Day vawi 63 na urhsun taka hman a ni. Lunglei District Bawrhsap Pu V.Sapchhunga, IAS, chu khuallian niin India hnam puanzar a pawt parh a, parade contingent 15 te zahna chibai buk alo chhang let a ni.

Lunglei Bawrhsap chuan India ram ropui mahni ro a inrel hranna in kum 63 hmel alo hmu ta chu a lawmawm in zalenna sualtute inpekna avanga lo awm anih thu a sawi a, zalenna avangin Mizoram pawh nasa takin hma alo sawn phah ve a ni a ti. Lunglei District a hmasawnna hrang hrang tarlang in sawrkar hma lakna hi sawrkar hnathawk te ringawt tan chuan tihhlawhtlin a harsat thu leh mipui vantlang kohhran leh tlawmngai pawlte phung bawmna a pawimawh thu a sawi. Bawrhsap chuan ram leh hnam a min siamtu Pathian ring chungin thawhhona tha neihpui zel turin Lunglei Districti mipui te a sawm nghal bawk a ni.

Vawiin Republic Day parade ah Sacred Hearth School contingent chu School uniform ha zing ah lamthiam ber niin, Armed contingent ah 57th Bn. BSF pakhatna an ni a, Unarmed ah Gov’t High School NCC te chu pakhatna anni bawk ani. Kumin Republic Day pual hian Hockey leh Table tennis ah te inelna siam a ni a, Lunglei Zotlang GSA chuan TT ah Gold medal la tam berin pakhatna an hauh a, Hauruang leh Lunglawn ten Hockey ah Final an khel bawk a ni.