Vawiin khan ChamphaiChhangphutField-ahIndiaRepublicDay vawi 66-na chu urhsun taka lawm a ni a. He hunah hian Champhai DC Pu Sangdingliana chu Khuallian niin, parade contingent 22-ten Hnam Puanzar chibai an buk chu chhangletin, Republic Day thuchah a sawi a. He hun hi Parliamentary Secretary leh bialtu MLA ni bawk Pu TT Zothansanga chuan a hmanpui bawk a ni.
Republic Day lawmna inkhawm bul tan nan Bawrhsap chuan Hnam Puanzar pawt pharhin, chibai a buk a. Republic Day Ceremonial Parade Contingent te a endik hnu ah; Parade Commander SI Lalsangzuala Sailo kaihhruaia Parade Contingent ten hnam puanzar chibai an buk chu Bawrhsap chuan chhang letin mipui te hnenah thuchah a sawi chhunzawm a ni.
Khuallian chuan rorelna ram dik tak Republic dinhmun sang taka kan ram hlankai anih lawmna a kalkhawmte chu chibai a buk a. Champhai District chhunga hmasawnna leh Department hrang hrangte hmalakna a tarlang a. Kum 2014-2015 chhung khan Chhangphut Field-a phul lem (artificial turf) phah zawh fel a nih thu te, Zotlanga Stadium chak taka sak mek a nih thu te, District Hospital building thar hawn te, Horticulture leh Turmeric Growers’ Association tangkawpin Tlangsamah Turmeric Pricessing Centre bun a nih thu te leh Anganwadi Centre 28 din thar a nih thu te a tarlang a.
Champhai District chhung Village Council tinah TFC hnuaiah Solar Street Light (LED) khaw 26 point 5 theuh pekchhuah a ni a, VC Category hrang hrangah pekchhuah tum mek a ni bawk.
Republic Day lawmna a Unarmed Contingent zawng zawng hnenah lawmman sem a nih bakah School contingent zingah titha zual 3 hnenah lawmman sem a ni a. Pakhatna chu Bethel Mission School (Boys) an ni a, Pahnihna chu Govt. Champhai High School (Girls) niin Government GM Higher Secondary School chu pathumna an ni.
DC Bungalow ah sawmbikte tan “DC’s At Home” buatsaih a ni a. Kumin Republic Day denchhen hian Champhai khaw chhunga Sorkar Office ten pawisa thawhkhawmin, Genesareth Home, Emmanuel After Care, TNT Champhai, Metakhen, Shelter Home leh Champhai District Hospital Poor Fund-ah te tanpuina hi DC Pu Sangdingliana chuan a sem a. A ni hi Pu R. Vanlalsawta, Addl. DC, Champhai; Pu Benjamin Lalzama, SDO (S); Champhai Officers’ Club hruaitute leh chanchinbumiten an tawiawm a ni.
