Vawiin khan Lawngtlai Central YLA Ground ah India Republic Day vawi 66 na chu ropui taka hman a ni a, Lawngtlai Bawrhsap Pu J. Hmingthanmawia chu khuallian a ni. Zing dar 10:30Am ah Khuallian hian hnam puanzar pawtparh in hnampuan zar chibai bukna a changlet bawk.

Thusawiin khuallian chuan Lawngtlai District mipuite chu Republic Day chibai a buk a, India ram chu mipuite rorelna ram a nih theihna tura Constitution lo duang chhuaktute zahna chibai a buk bawk. Remna leh muanna boruak hnuaiah lo chuan hmasawnna ke chheh a har avangin mipuite chu remne leh muanna chawinung zelturina fuih a,kanhmabakte chu chak takinkanhmachhawn zel dawn a ni a ti bawk. Khuallian hian Lawngtlai District chhunga hmasawnna hnathawh engemawzat a tarlanga, NLUP Scheme atangin Lawngtlai District chhungah chhungkaw 12,222 te hnenah tanpuina sem a nih tawh thu te,Greater Lawngtlai Water Supply Scheme chu kum 2015 chhung ngeia peihfel a nih tur thute, Multi Modal Transit Transport Project chu hna chanve thawhzawh a nih tawh thute leh IWMP, MGNREG, LADC hnuaia hnathawh hrang hrang bakah RKVY, PMGSY, BRGF leh kawng hrang hranga Lawngtlai District hmasawnna te a tarlang a ni.

Kumin Republic Day ah hian kum danga tih ngailoh, Department hrang hrangten an hnathawhte mipui hnena hrilhhriatna thuziak an tar chhuah pawh Khuallian hian a endik nghal a. Heng inphochhuahna thuziakte hi Department ten a intiat theuhva siamin Day hmanna hmunah an tar chhuak hlawm a ni, a ti tha Department te hnenah At Home Tea Party ah lawmman sem a ni ang.

Kumin Republic Day ah hian Parade Contingent 19 ten Parade Commander SI Tlircheuva, MAP kaihhruaina hnuaiah hnam puanzar chibai an buka, Parade Contingent tithate hnenah Khuallian hian lawmman a sem nghal ani. Unarmed Contingent zingah Model English School (Guides) ten lawmman pakhatna dawngin, Ngurnunsangi English School (Scout&Guides) leh Downtown English School (Scout & Guides) te chu pahnihna leh pathumna an ni.

School Contingent-ah Don Bosco Girls ten lawmman pakhatna dawngin, Downtown English School Boys & Girls ten pahnihna an dawnga, Jehova Jire School Girls ten lawmman pathumna an dawng thung.

Republic Day vawi 66 na pual hian Lawngtlai District ah Volleyball Tournament buatsaih a ni bawka,  he intihsiakna ah hian Lawngtlai Vengpui chu pakhatna niin, College Veng chu pahnihna an ni a, hmeichhe lam inelnaah Kawlchaw West chu pakhatna niin Colleg Veng chu pahnihna an ni bawk. Mimala ti thate pawh thlanchhuah an ni. Heng inelnaa ti thate hnenah hian khuallian hian lawmman a hlan nghal bawk a ni.

CYLA Ground a a lawmna pui ber neih a nih hnu hian Circuit House tualah Bawrhsap chuan sawm bikte pualin At Home Tea Party a buatsaih bawk a ni.