Vawiin khan  Champhai Venglai Community Hall ah DRDA Champhai leh Krishi Vigyan Kendra (KVK) hmalakna in India sawrkar hma lakna thar New India Movement chungchang zir ho a ni a. Champhai North Bialtu Pu TT Zothansanga Parliamentary Secretary chu khuallian niin he hun hi a hmanpui.

Khuallian chuan Sawrkar hmalakna thar chu a pawimawh thu sawiin retheihnate, chi inthliarnate ti boa faina kawng leh kut hnathawkte lakluh tihpunna kawnga hma kan sawn theihnan mahni khawtuala hmalak theuh a pawimawh a ni a ti. He hmalakna ti hlawhtling tur hian State danga zu kal a tha thawh lampang niloin kan Mizoram chhung ngeia kawng hrang hranga mahni phaktawka hmalak hian New Mizoram kan din thei a chu chuan New India dinna tur kawnga kailawn pawimawh tak pakhat a nih thu a sawi a. Pu TT Zothansanga chuan Kan ram leh hnam vei dan kawngah ngaituahna fim hman a tul thu sawiin a haw haw zawnga hma la loa thiamna leh finna kawnga theihtawp chhuah chu kan ram leh hnam himna tur a nih thu a sawi bawk . Hetih lai hian kan hmasawnna chi hrang hrangte a bikin mobile phone leh Social Media te chu hman dan chintawk thiamloh chuan awmze neiloa hun khawral na mai a ni a ti a, zirlai ti bahlah khawpa khawtlang thila inhman te pawh hi in enfiah a pawimawh a, thalaite chu kan ram leh hnam la kaihruaitu tur an nih avangin nunphung uluk an zawh a pawimawh thu a sawi bawk. Hemi kawngah hian nu leh pa te chu mawhphurna sangber chelhtu an nih thu a tarlang a ni.

He hun hi Pu Vanlalngaihsaka Champhai Bawrhsap chuan kaihruaiin he program hman chhan leh a tobul te chu kalkhawm mipuite hnenah  hrialhhriatna a nei a. Agriculture, Horticulture leh KVK atanga mithiam ten kut hnathawktute tharchhuah a pun theih dan tur kawng hrang hrangah zirtirna an pe a, DRDA chuan kalkawm te atanga tharchhuah kawnga harsatna hrang hrang an tawh chungchangte sawihona hun an hmanpui bawk a ni. He hunah hian Champhai District khaw hrang hrang leh veng hrang hrang atangin VC member te an tel tha hle a a kaihhnawih Department Official ten an telpui bawk a ni.

New India Movement hi kum 1942-a India ram zalenna sualtute’n Quit India Movement an huaihawt leh a hnu kum 5-a India ramin zalenna a lo neih tak dan hre rengin, Quit India Movement kum 75-na, kum 2017 atanga kum 5 chhungin retheihna, hlemhletna leh chi inthliarna te awm lohna ram, ram fai leh thianghlima India ram thar din chhuak tura sawrkar laipui ruahman a ni a. Kum 2022-ah chuan he dinhmun hi thlen hman ngei tuma hmalak chhoh zel tur a ni.