Mizoram hmundang rualin vawiin khan Mizoram State Anti-Tobacco Day chu Champhai DC Pu H. Lalengmawia hovin I&PR Auditorium, Chanem Building-ah hman a ni.

Mizoram State Anti-Tobacco Day puala inkhawmah hian khuallian Pu H.Lalengmawia, Champhai DC chuan ram leh hnama danglamna a thlen dawn chuan a vei hmasatu nih an awm a ngai a, vaihlo laka Mizote kan fihlim theihna tura ke lo pen hmasatute hmalakna hi engtikah emaw chuan a takah a la chang ngei ang, a ti a. Thalaite zingah vaihlo intihhmuhna a lian chho zel thu leh hemi kawnga nu leh pate mawhphurhnaDC chuan a sawi a. Thalaiten entawn tur tha an mamawh a, chu chu nu leh pate hian nih kan tum tur a ni. Fa tha tak neih tum laia nu leh pain entawn tur kan hnutchhiah loh chuan hlawhtlinna hmuh a har hle ang, a ti a. Vaihlo laka fihlim a, nun thianghlim tak hmang turin kalkhawm zirlaite chu a chah a ni.

Vawiin inkhawmah hian Pi Vanlalmuanawmi, District Consultant, DTCC chuan report a pe a, vaihhloin mihring hriselna a khawih pawi theih dan ngaithlak a ni bawk. He ni pual hian Champhai DC Pu H.Lalengmawia chuan Champhaiah vaihhlo leh a kaihhnawih zawrh chhuahna khapna thupek a lo chhuah tawh a, Health Deptt chuan a mala cigarette zawrh chhuah chu Mizoram pumah a khap bawk.

Kum 2013-2015 chhung khan Champhai District-ah Anti-Tobacco Squad te hmalaknain squad drive vawi 44 neih a ni a, phal lohna hmuna meizu mi 87 manin, heng mite pawisa chawi tlingkhawm chu cheng 5070 a ni a, pictorial chuang lo cigarette carton 10 leh cheerot pack 6 man tawh bawkin, hemi kaihhnawiah hian mi 3 an man bawk. Champhai district-ah Champhai bakah Ngopa RD Block-ah Anti-Tobacco Squad leh Hnahlanah Anti-Tobacco Society te an awm a ni.