Pu P.C. Lalthanliana, Social Welfare Minister chuan, Aizawl khawpui veng 5, Khatla, Venghlui, Tuikual South, Tuikual North leh Dawrpui veng YMA Branch te’n Aizawl khawpui a lo thianghlim zawk theihna tura beihpui thlak Joint YMA Operation an kalpui mek chu, zanin 8:40pm khan an duty-na hmun, Vanapa Hall sira an office-ah tlawhin, Central YMA kaltlangin tanpuina cheng Nuai khat a hlan.

Hemi puala hun tawite buatsaihah Pu PC Lalthanliana chuan tanpuina hi Central YMA President Pu Lalbiakzuala hnenah hlanin, Central YMA President chuan Joint YMA Operation hruaitute hnenah a hlan chhawng leh nghal a ni.

Minister chuan thu sawiin, kumpuan bawhzuina atan leh kawng tinrenga Aizawl khawpui a lo thianghlim zawk theihna tura YMA Branch 5 te hmalakna chu Sorkarin a hriatpui a, a remchan theihna chin chinah sorkarin a tawiawm zel dawn a ni a ti. Minister chuan khawtlang nun tibuaitu sualna chi hrang hrang do tur leh tirem tur chuan Sorkar, Kohhran leh Tlawmngai pawlte hi an pawimawh veka, tha taka thawhho a tul a ni a ti. thahnem ngai taka tlawmngaia duty tura thawkchhuak te chu fuihin sualna chi hrang hrangte hi a changin spring angin lo pawng leh thin mahse, tha thlahlova beihna avangin a dul hun a awm ve mai, tunhmaa Dawrpui a ‘Ata Lane’ tia sawi thin pawh kha sorkar, kohhran leh tlawmngai pawlte hmalakna avangin a awmzui ta lo a ni a ti.

Treasury Square leh Zodin Square hnaih veng panga te hian thla kalta August ni 28 atang khan a chhawka zan lam duty insiamin, Canteen Kual, Zodin Square, Vanapa Hall chheh vel, Treasury Square, Tennis Court chhehvel leh City Park-te chu zu, ruihhlo leh a kaihhnawih sualna chi hrang hrang leh mipat hmeichhiatna hman khawlohna lakah humhalh turin heng YMA Branch 5 te hian hma an la mek reng a ni.