Vawiin khan I&PR Auditorium-ah Champhai District Anti-Tobacco Squad buatsaihin World No Tobacco Day hman a ni.

He ni hmanna inkhawm hi Pu T.T. Zothansanga, Champhai North Constituency MLA chuan khuallian niin a hmanpui a, thu sawiin khuallian chuan, Mizote hi zuk leh hmuam uar hnam kan ni a. Rawngbawl tur pawhin vaihlo ti thinte hi an tlak loh tial tial tawh a ni, a ti a, Mizoten hmun dang danga zai leh rawngbawlna danga kan chhuah thinna a kan zai an fak viau laiin kan hmel tichhetu chu mei kan zuk nasat lutuk avang leh vaihlo kan uar lutuk hi a ni a, Mizo ngaisangtute tan belhchian kan dawl lohna chhan ber chu zuk leh hmuam hi a ni, tih sawiin, zuk leh hmuam kan tih nasat avangin infiamna huangah kan thleng thui thei lova, eizawnaah pawh harsatna min siam sak nasa hle a ni, a ti.

Meizuk hi kan hriselna atan a tha lova, he mai bakah hian kan bul vela mite tan a tha lo hlei hlei zawk a ni tih sawiin Pu TT. Zothansanga chuan Mizoram puma Anti-Tobacco squad te hmalakna avangin zuk leh hmuama kan fihlim lohna hi chu a ziaawm ngei ka beisei a ni, a ti a, zirlai kalkhawmte chu ram leh hnam tana an tangkai theihna chu zuk leh hmuam a fihlim hi a ni tih vawng tlat turin a chah bawk a ni.

World No Tobacco Day puala inkhawm hi Pu C. Lalremliana, Vice President,ISTH chuan a kaihruai a, Dr C.Vanlalhlua, Member Secretary chuan Power point presentation hmangin zuk leh hmuamin mihring-a natna chi hrang hrang a thlen theih leh a that lohna te entirna a nei a, Kumin a thupui “Live It up without lighting up” tih chungchanga Dr. Jane R.Ralte, State Nodal Officer, Mizoram State Tobacco Control Society paper buatsaih chhiar chhuahna hun hman a ni bawk.

Vawiin hian Sub-Hqrs MHIP, Champhaiin sumdawng hnen atanga an man tiranga leh gutkha, Cheng nuai hnih chuang man an man khawm chu Champhai DC Pu Vijay Kumar Bidhuri chuan CHANEM kawtah a halral nghal a, he hun hi sawmbikte leh zirlai naupang thahnem tak in an hmang a ni.