Vawiin khan Champhai khaw chhunga zirna in hrang hrangah zirtitute ni (Teacher’s Day) lawmna hun hman a ni.

Hemi ni denchhen hian Champhai Bawrhsap Pu Vanlalngaihsaka chu Govt. GM Higher Secondary School leh BC English Academy ah khuallian niin a hmanpui a. Khuallian chuan thu sawiin September ni 5 Teacher’s Day a hman a nih chhan chu Pa ropui leh pa fing Dr. Sarvepalli Radhakrishnan a nih thu tarlangin, India ram President a nih laia a thawhpui ten a piancham chu ropui taka lawm an rawt laiin Dr. S. Radhakrishnan chuan a piancham chu Zirtirtute hriatreng nan leh chawimawi nan hman a duh zawk thu a sawi a. Hemi denchhen hian 5^th September 1962 atangin Teacher’s Day a tan hman zui a nih thu a tarlang a. Khuallian chuan kalkhawmte chu fuihin Dr S Radhakrishnan a tangin piancham lawmdan te pawh kan zirthar a tul thu a sawi a, midang tana malsawmna ni turin mahni pianchama thisen pek, damlo tanpui leh mahni aia harsa te tanpui chu piancham lawm dan tha tak a nih tur thu a sawi a ni.  

Zirlai te chu mahni zirtirtute thu awiha an zilh hauhna te leh zirtirna te chu zawm tha turin a fuih a, Mobile Phone leh Internet te pawh mahni zirlai tana tangkaipui tlaka chhawr tura fuih bawkin, Mizote chu hnam tlemte kan nih avangin hnam dangte laka kan himna tur chu zirna niin hnam lian zawkte laka ro kan rel ve theihna turin All India Services chu tum tak tak na nena nih tum theuh turin a chah bawk a ni. Mahni Nu leh Pa leh Zirtirtute thu awih chu nunkawng dika min kaihruaitu leh mi puitling a min chher chhuaktu a nih thu a sawi bawk a ni.

He hunah hian Dr S Radhakrishnana chanchin ngaithlak a nih bakah cultural item leh intihhlimna chi hrang hrang nena hun hman niin, zirtirtu thawktha State Awardee Pu Lalthantluanga (GMHSS) hnenah Champhai District Education Committee aiawhin Chairman Pu Vanlalngaihsaka chuan chawimawina thuziak a hlan a ni.