Nimin chawhnu khan Lunglei District Sanitation Task Force and Cleanliness Week Observance Committee chu an Chairman Lunglei DC, Pi Lalzarmawii kaihhruaiin a office chamber-ah an thukhawm a. UD&PA Department buatsaih ‘Mizoram Khawpui Fai Inelna-2017’ tura inpuahchah dan tur leh kumin Cleanliness Week Lunglei District chhunga hman dan tur an rel. Meeting-ah hian sawrkar department hrang hrang leh zirna in hotute, tlawmngai pawl aiawhte leh khawtlang hruaitute an tel a ni.
Pi Lalzarmawii chuan faina chu mitin mawhphurhna a ni tiin Mizoram chhunga District fai ber ni tura tan la turin mipuite thawhho puiah a sawm a. Faina chu sawrkarin a ngai pawimawh a, hemi kawnga hmalakna ah pawh sum tam tham tak sen thin a ni tiin Bawrhsap chuan faina kawngah mipuite chu Sawrkar ringawta innghat lova hma an lak ve a tul a ni, a ti. Faina leh thianghlimna kawnga hmasawn theihna tura hmachhawpte kalkhawmte chu sawipuiin Mizoram Khawpui Fai Inelna - 2017 hnuaia tehkhawng hrang hrang a Sawrkar leh mipuite'n tan an lak theih dan tur an sawiho.
Pu Andrew Lalhruaia, DUDO, Lunglei District chuan District Sanitation Task Force din a nih chhan leh "The Mizoram Urban Sanitation & Solid Waste Management Policy-2011" kalpui a nih dan tlangpui kalkhawmte a hrilh a. Faina kawnga kan khawpuiten hma an lo sawn zelna turin ‘Mizoram Khawpui Fai Inelna-2017 chu ruahman a ni tiin Pu Andrew Lalhruaia chuan he inelna neih dan tur leh Khawpui fai endik anih dan tur a sawifiah bawk.
He Khawpui fai inelna atang hian Mizoram a khawpui zawng zawng Ranking 2017 siam a ni ang a. He inelna-ah hian Mizoram-a khawpui 23 te an tel vek ang a. Mizoram khawpuite hi Category 2-ah thenin hetiang hian inelna siam a ni ang :
A. Category I (District Headquarters) - 1).Aizawl, 2).Lunglei, 3).Champhai, 4).Kolasib, 5).Serchhip, 6).Mamit, 7).Siaha, 8).Lawngtlai
B. Category II(Other Towns) - 1).Saitual, 2).Khawzawl, 3).Hnahthial. 4).Vairengte, 5).Tlabung, 6).Kawnpui, 7).Thenzawl, 8).N.Vanlaiphai, 9).Darlawn, 10).Zawlnuam, 11).Biate, 12).Khawhai, 13).Sairang, 14).Lengpui & 15).Bairabi
Mizoram Khawpui Fai Inelna-2017 hi Urban Areas-in a huam chin khawpui 23 zawng zawngte huap tur a ni a. Heta khawpui fai endikna tura tehkhawng hrang hrangte chu hetiang hi a ni ang:
1). Open Defacation Free - 30
2). Solid Waste Management - 20
3). Information, Education & Communication - 10
4). Community Participation - 15
5). Drains - 15
6). Public Feedback - 10
Total - 100 Marks
Khawpui fai inelna - 2017 inpuahchahna kal zelah chuan naktuk 6th September , 2017-ah hian hawnna programme ropui tak neih ni se tih committee chuan a rel a. He hawnna inkhawm hi Mizofed kawtzawl, Venglaiah neih tur niin hemi hnu hian Lunglei khawpui hmun hrang hrangah faina hnatlang neih a ni nghal dawn bawk.
Nimin Committee-ah hian Faina Hapta October thla a neih tur chungchang pawh sawiho a ni a, Veng fai, Sikul fai leh Office fai te thlanchhuah a, lawmman leh citation buatsaih leh nise tih committee chuan a rel a. Thupui in ziah siak (slogan writing competition) leh thu insawi siak (extempore speech) te neih tura thu rel a ni bawk.
