Vawiin chawhma khan District Institute Of Education And Training (DIET) Assembly hall Lunglei ah DIET Trainees Union buatsaih in Teacher’s Day 2017 hman a ni. Minister Pu P.C. Lalthanliana chuan khuallian niin a hmanpui.

Teachers Day lawmna inkhawm hi PC.Rohmingliana, Vice President DIET trainees Union in a kaihruai a. Pu P.C. Lalthanliana chuan thu sawiin Mizoram hi zirna ah hma a sawn hle a, tunhma chuan zirtirtu training mumal nei lovin naupangte an zirtir thin a, tunah chuan zirtirtu te training chu zirtirtu hna zawm hnu (in service) ni tawh lovin zirtirtu ten hna an zawm hma (pre service) in sawrkar in a kalpui tawh a ni, tiin hei hian naupangte zirna ah hma a sawn tir phah hle a ni, a ti. Zirtirtu training lova naupangte enkawl hi doctor lem in damlote damdawi an chawh ang hi a ni a ti.  Zirtirtu tha ni tur chuan inbuatsaihna neih a ngai a ni tiin Minister chuan naupang zirtirna leh kaihhruaina kawnga nasa lehzuala tan la turin kalkhawmte a fuih a. Nakin lawk a zirtirtu ni tur a buatsaihtu  zirtirtu te hi ngaihlu in chawimawi thiam ila, hei hian kan hnam leh ram tan hmasawnna tam tak a thlendawn a ni, a ti. Trainees te pawh taimakna leh tih tak takna nena zir theuh tur in a chah bawk a ni. Kum 2018 atangin DIET Lunglei ah B.Ed zirna hawn a ni dawn a, zirtirtu te pawh thahnemngai taka thawk turin a chah a ni.

Pu H.Lalzarliana, Principal DIET Lunglei pawhin thu sawi in zirtirtu ten a tha zawng in thil thlir thiam ila, naupangte hi ram tana training an ni a nakin lawk ah naupangte zirtirtu an la ni dawn a ni a ti. Thawhrimna leh thuawihna nen a zir theuh turin trainees te a chah nghal bawk.

Lalnunsanga renthlei, General Secretary, DIET Trainess Union chuan report pe in tun dinhmun ah 1^st Semester leh 3^rd semester ah zirlai 131 awm in, zirtirtu 19 an awm bawk a ni.

FH.Lalhmangaihzuala, (ECM) in Teachers Day thuchah sawina a nei in, Trainees Union te hian zirtirtu te chawimawi nan thilpek hlan na hun an hmang bawk.

Vawiin Teachers Day lawmna inkhawm  ah hian Minister Pu P.C. Lalthanliana chuan  DIET Trainees Union te hman tur computer set khat leh TT Board a pe bawk.