Vawiin chawhma khan Baptist Higher Secondary School (BHSS), Lunglei chuan BHSS Tucker Hall-ah Teachers Day pualin function an buatsaih a. Lunglei East Assembly Constituency bialtu MLA Pu Joseph Lalhimpuia chuan khuallian niin a hmanpui. He hunah hian BHSS zirtirtu leh zirlaite chuan Pu Joseph Lalhimpuia hi BHSS chawimawina sang ber 3 Star Badge pein chawimawina thuziak an hlan a. An thuziakah chuan ‘Hun lo kal zel turah kan ram leh Kohhran tana theihtawp chhuaha tangkai taka I in hman zel theih nan zirlai I lo nih ve tawh thinna BHSS (Christian High School) Serkawn family chuan kan duhsakna kan hlan a che” tiin an ziak a ni. Pu Joseph Lalhimpuia chuan Mizoram sawrkarin BHSS school building sak belhna tur atan Rs Nuai 70 a ruahman sak thu a puang bawk.

Pu Joseph Lalhimpuia chuan kum 1961 khan Christian High School hi Rev R.F. Tucker hovin din tan a ni a, tunah phei chuan Mizoram huap pawha school naupang ngah ber pawl in ni, a ti a. Serkawn hi Mizoram Oxford tih hiala koh thin a ni a, Literature, Hla, drama te Mizo te zinga vawrh lar tantu a ni a, hei hi kan chhawm nun zel a ngai a ni, a ti. Pu Joseph Lalhimpuia chuan zirtirtu hna hi Pathian rawngbawlna a ni a ti a. BHSS zirlai 930 chuang te chu Lunglei khawpui a thalaite kawngdik zirtirtu, faina kawnga hmahruaitu, tlawmngaihna chawi nungtu ni zel turin chona lian tak in nei a ni, a ti.

Pu Joseph Lalhimpuia chuan Mizoram chhunga zirna in hma a sawn theih nan sawrkarin tan a lak dan sawiin nikum thleng khan Middle School leh High School-ah Science leh Mathematic teacher bik kan nei lova, school-a thawk zinga a ti thei awm deuh te inphuahchawpin Science leh Math te an zirtir thin a, nikum atang khan sawrkar chuan Recruitment Rules thar siamin Science leh Mathematics zirtirtu tur bik liau liau a la tan ta a ni, a ti.

BHSS Teacher’s Day-ah hian school naupangte’n an zirtirtu thilpek hlanin, lemchan, zai leh an thiamthil chi hrang hrang hmangin an zirtirtute chawimawina hun an buatsaih a ni.