Vawiin khan Zirtirtute Ni vawi 56-na chu Lawngtlai-III-a CYLA Hall-ah Lawngtlai khawpui chhunga High School leh Higher Secondary School zirtirtute leh zirlaite nen hman a ni.

He hun hi Lawngtlai District Education Officer Pu Lalzuiliana chuan kaihruaiin, kal khawmte lawmna thu a sawi a. Govt Region HSS zirtirtu Pi Lalrozaii chuan Mizoram Education Minister thuchah chhhiar chhuakin, LADC-a Asst Education Officer (M/S) Pi Vanbawithasung Chinzah chuan Lawngtlai District Bawrhsap thuchah a chhiar chhuak thung a. Downtown English School zirtirtu Pi Laldinpuii Bawitlung chuan zirtirtute tana awm dan mawi (manners & etiquettes) chungchang paper a buatsaih sawiin, All Teachers Association Lawngtlai (ATAL) President Pu K. Hrekung chuan lawm thu a sawi bawk.

Thu sawi kar lakah hian zirlaite atangin zai leh lam hmuhnawm tak tak ngaihthlak leh thlir ho a ni a. Downtown English School te’n hnam lam entirin,  Ngurnunsangi English School Dance Crew leh Don Bosco School te’n lam chi dang an entir bawk a. Melody Kumsangmawii, Lalinpuii Chinzah leh Govt Region HSS zirlai Vanlaldinchhungi te’n zaiin kal khawmte an awi bawk.

Vawiina Lawngtlaia Ziritrtute Ni hmannaah hian zirna lama inhmangte leh zirtirtu leh zirlai thahnem tak kal khawmin hun hlimawm tak hman a ni a. Kumina Mizoram atanga National Award for Teacher lawmman dawngtute lawmpui nan kal khawmte chuan dingin kut an beng rual bawk a ni.