Save Chite Lui Coordination Committee (SCLCC) chuan nimin khan an Patron, Larsap Lt. Gen. Nirbhay Sharma(Retd) kaihhruaina hnuaiah Chief Minister Pu Lal Thanhawla pawh telin Raj Bhavan-ah Special Meeting an nei a. 

Meeting-ah hian Chite Lui ruamah hmalakna hmelhmang kum in chhunga a lan ngei theihnan chak zawka hmalak leh mipui nawlpui hmalakna huanga a sawm luh rel a ni.

SCLCC Patron leh Larsap Lt. Gen. Nirbhay Sharma chuan thusawiin Chite Lui chhanchhuak tura hmalakna kalzel hi India ram pum tana entawn tur tling khawpa kalpui theih a nih thu leh chutiang taka tan la turin Mizo mipuite a sawm a. India ram hmun tam taka an hlawhchhamnaah Mizoram chu a hlawhtlin a rin thu a sawi a. "Mizo te chuan sakhaw thuhmun, tawng thuhmun kan neih bakah vantlang tana fehchhuahna kawngah kan chian em avangin hlawhtlinna lian tak kan nei thei a. Chite Lui fai leh mawi buatsaih hi Mizo mipui ten kan Krismas thilpek atan puitlin i tum ang u", tiin sawmna a siam a ni.

Chite Lui chu Aizawl khawpui ti mawi a, tinuam thei tura awm, a nihna leh mawina hloh tawh siam that ngai a ni tih sawiin "khua leh tui te pawn thil tha siam turin kan sum kan theh chhuah phal a ngai ve thin a, Chite lui tih thianghlim nan keipawhin ka thawh ang a, tichuan mi thahnem ngai zawng zawng te pawn tlemlua awm lovin thawh tlan theih vek i tum ang u", tiin a tak a chet chhuah a tul tih a tarlang.

SCLCC Meeting ah hian Chief Minister chuan an naupan laia Chite Lui a hriat thin, lui lian pangai tak, sangha lian deuh zawk, Nghatun te pawh awmna leh lenkhang zar theih khawpa lian a lo danglam ta lutuk leh tawp ta lutuk chu pawi a tih thu a sawi a. A siamthat nan khua a tlai lo tih sawiin Chite lui a lo dam khaw chhuah leh nan lui kama mimal ram neitu te leh Chite lui fintu Lui te zawk kama mimal ram neitu ten rilru zau taka an ramah thing leh mau phun an phal a tul a ti a. Chite lui hnar leh sir tawn tawn a Aizawl Veng lian deuh deuh a mipui te chu an bawlhlawh chinfel danah an fimkhur zual a tul tih a sawi a ni.

Chief Minister chuan Chite Lui chhanchhuak turin mitinin mawhphurhna kan neih vek thu sawiin Chite Luiin a luan tlang MLA Constituency 8-a Bialtu MLA-te pawh he hmalakna pawimawh tak atan hian an MLA Local Area Development Fund atang te pawh asum rawn thehchhuah an harsat a rinloh thu sawi a. Aizawl khawpui thangzelah khawchhunga lui te ngaihven a tul tawh ti in Chite Lui tlukin  Tuikual Lui pawh a theih ang anga humhalh leh tihfai a hun tawh takzet  tih a sawi tel a ni.

SCLCC chuan Krismas hma ngeia Mizo mipuite hnenah Chite Lui fai leh thianghlim zawk pe tura hmalakna atana September 29-ah leh November 24-a Aizawl khawpui chhunga zirna in hrang hrang 24-a NSS Volunteer-te’n ‘Chite Lui Tihfai Hnatlangpui’ an neih tur a rel a. 

Hnatlangpui hawnna hi September 29-ah Bethlehem Venga Forest Department hmunah neih tura ruahman a ni. Information & Public Relations Department nen tangkawpa Chite Lui Documentary Film siam zawh tawh chu zau zawka thehdarh zui zel ni se an ti a. He thutkhawmah hian Forest Department aiawhte’n kumina Green Mizoram Day-ah khan Chite Lui kam tuakah thing tiak 2160 leh mau chi hrang hrang engemawzat phun thar a nih thu an sawi a. Aizawl Bawrhsap-in Chite Lui leh a chhehvela leivung leh bawlhhlawh paih khapna Section 144 Cr.P.C. hmanga thupek a chhuah chungchang chu Addl. DC-in an bawhzui dan a sawifiah a, pawtsei zui tura hmalak ni se an ti. He hmalakna hi sorkar hmalakna ni mai lo va mipuite hmalakna a nih lehzual theih nan mipuite hnen atangin tlem lua tam lua awm lo va vehbur khawn dan dap ni se an ti bawk. Chite Luiin a luan tlang MLA Constituency 8-a MLA-te nen Chite Lui chhanchhuak tura hmalakna thuah Brainstorming Session nei ho tura hmalak mek a nih thu sawi a ni bawk. 

SCLCC Chairman leh Chief Secretary Pu Lalmalsawma, IAS in he thutkhawm hi a kaihruai a. Sorkar Department hrang hrang hotute leh tlawmngai pawl hruaitute an tel tha hle a ni.