Vawiin chawhma kha Pu Lal Thanhawla chuan ni 4 chhung awh tur, North East Zone Inter State Badminton Championship, Aizawl 2017 chu a hawng a. He badminton championship ah hian Indian Hmarchhak state 8 aiawh shuttler te an tel kim vek a ni.

North East Zone Inter State Badminton Championship, Aizawl 2017 hawngtu Chief Minister chuan he championship puala buatsaih, Souvenir a hawng a. Mizoram Badminton Association in an pawl website an siam pawh a hawng nghal a ni.

Infiamna pawimawhzia sawiin Chief Minister Pu Lal Thanhawla chuan mi chi hrang hrang leh mize chitinreng te phuarkhawm thei khawp a thil ti thei a ni a ti a. "India ram zau tak, sakhaw hrang tam tak awmna, hnam chitin reng chennaah bik phei chuan 'Unity in Diversity' hi kan chakna a ni a. He kan inpumkhatna atan hian sports hi a pawimawh hle a. Hmelhriat thar, thian thar siam nan te leh inlaichinna tha zawk siamna atan kan vaiin kan hman thiam a ngai", a ti. Inkhelhna tournament lian tham Mizoram in a thlen a piangin khua leh tui zawng zawng ten mawhphurhna kan nei vek tih a sawi a. "TAXI driver  atanga Organiser, infiammi, officials leh mipui vantlang thlengin Mizoram hming titha turin theihtawp kan chhuah a; Mizo Nun Zemawi leh Tlawmngaihna lanchhuahtir na hun remchangah hman kan thiam a ngai a ni", a ti a. Championship a Badminton khel tur te duhsakna hlan in infiammi hlawhtling thin te chu mi hawihhawm, mi taima, tumruh, zuk leh hmuama fihlim an ni a. Chhunglam leh pawnlamah pawh midang te aia insumthei zawk, mi entawn tlak te an ni a ti.

North East Inter State Badminton Championship hi Badminton Association of India programme pakhat zing a mi niin kum tina National Inter State Team Championship a tan a Zone tin atanga qualify tur zawnna a ni.Senior Mixed Team leh Junior Mixed Team a Champion te hian North East Zone aiawhin National Inter State Team Championship ah an khel thei dawn a. Open bik singles  a semi final chin leh doubles finalist te hian National Championship leh Open atan  an  qualify nghal dawn bawk a ni.

Tun tuma Mizoram Badminton Association in a thlen NE Zone Championship-ah hian Mizoram Team tiamin player leh Official te hi mi 155 an ni dawn a ni.

Badminton Association of India  atangin he Championship atan hian Pu Bamang Tago - Honorary Secretary,Arunachal Pradesh State Badminton Association leh Pu.Omar Rashid - Badminton Association Of India Joint Secretary & Honorary Secretary of Assam Badminton Association te chu Observer atan ruat an ni a. Chief Referee turin Pu Gyneswor Singh,Manipur ruat a ni.

NE Zonal Inter State Badminton Championship, Aizawl 2017 atana Organising Committee chu Sports Minister  Pu Zodintluanga Chairman na hnuaiah din a ni a Mikhual te hi a  cham chhungin Lai Hostel,Salem Veng,Synod Conference Centre leh Tourist Lodge,Chaltlang leh Esquire Hotel,Sikulpuikawnah te thlen tir an ni.