Nimin chawhnu khan Lunglei District Task Force for Immunization chu an Chairman Lunglei DC, Pi Lalzarmawii, IAS kaihhruaiin a office chamber-ah an thukhawm a, Tlabung Sub-Divisional Hospital, Lungsen Primary Health Centre leh Bunghmun Primary Health Centre huamchhunga Intensified Mission Indradhanush kalpui dan tur an rel. Meeting-ah hian Health Department hotute bakah Social Welfare Department, I&PR Department leh YMA, MHIP hotute an tel a ni.

Pi Lalzarmawii chuan hriselna kawnga sawrkar laipui hmalakna thar pawimawh tak Intensified Mission Indradhanush chak taka kalpui a nih theih nan Department hrang hrang ten thawhhona tha tak an neih a tul a ni, a ti a. Health Department-in hri danna vaccine an pek kawnga harsatna an tawh hrang hrang te sawipuiin Lunglei DC chuan heng harsatna te sutkian an nih theih nan Health worker, anganwadi hnathawkte, Programme Officer ICDS, Block Development Officer, District Local Administration Officer, BSF leh tlawmngai pawl hrang hrang te thawkhoin hri danna vaccine pek runpui hi kalpui a ngai a ni, a ti.

Mission Indradhanush hi sawrkar laipui hmalakna niin December 25, 2014 khan hawn a ni a, Mizoramah April ni 7, 2015 atang khan Lunglei, Lawngtlai, Siaha leh Mamit District-ah te kalpui tan a ni. He Mission-in a tum ber chu hri danna vaccine hmanga ven theih natna (vaccine preventable disease) 7 – Diptheria, Pertussis, Tetanus, Childhood Tuberculosis, Polio, Hepatitis B leh Measles hri danna vaccine naupang kum 2 hnuailam leh nu naupaiten ten a thlawna vaccine tha an lak ngei theihna tura ruahmanna a ni. Intensified Mission Indradhanush hi Mission Indradhanush chak zawka kalpui theihna tura duan a ni a, October ni 7,2017 atang hian hman tan tur niin, December 2018 hma ngeia District chhunga naupang zawng zawng hri danna vaccine pek hman tur a tih a ni.

Intensified Mission Indradhanush hnuaia Lunglei District chhunga hmalak dan tur chu a hnuaia tarlan ang hi a ni:

Lunglei District huamchhungah hri danna vaccine la duhlo anla awm avangin leh inbiakpawhna leh inkal pawhna kawng te a that tawklo avangin Health Department-in vaccine an pek chhuah kawngah harsatna an tawk nasa thin tih Committee ah hian sawilan a ni a.  Committee chuan Lunglei District chhunga hri danna vaccine pek tun aia chak zawka kalpui anih theih nan Block Level Task Force for Immunization chu Block tinah din ni se tih a rel.