Vawiin chawhnu khan Raj Bhavan-ah Mizoram Governor Lt. Gen (Retd) Nirbhay Sharma PVSM,UYSM,AVSM,VSM kaihhruaina hnuai-ah Healthy Mizoram Campaign leh Project HIMNA-MADAT chungchan sawihona neih a ni a. Meeting-ah hian Chief Minister Pu Lal Thanhawla, Chief Secretary Pu Lalmalsawma bakah sawrkar lama mi pawimawh tak takte leh NGO aiawhte an tel a ni.

Meeting kaihruaitu Mizoram Larsap chuan Mizoram chuan theihna leh thiamna nasa tak  nei chunga hriselna lam kawnga harsatna a tawk fo chu a ngaimawh thu a sawi a. Khawtlang siam thatna turin kohhran, NGO, sawrkar leh pawl hrang hrangte rim taka an thawk chung pawha ruihhlo a hluar zel chu a vei thu sawiin hemi tireha nuaibo tur chuan kan zavaia inthuruala thawhho angai a ni, a ti a. Kan thalai nakin lawka ram hmel lanna turte chhanchhuak tur chuan a hmasa berah ruihhlo chi tinrengte lo awm chhan  chhuia tihrem angai a; hemi tur hian chhungtin, khawtlang leh State pum huap thlenga kan thawhho angai a ni a ti a. Naupangte entawntlak ni thei turin upa zawk te hian mawhphurhna sang tak kan neia, kan nunah chumi chu kan lanchhuah tir thin tur a ni, a ti a. Hriselna kawngah kan taksa tana tha tur chu engpawh nise zawm hram hram tum thin ila, thil thalo erawh chu tih chin loh tur a ni, a ti a. Mipui nawlpuiin ruihhlo heng; zu, damdawi leh vaihhlo leh a kaihhnawih chungchanga hriatna zau zawk an neih theih nana inhrilhhriatna neih chu tun aia nasa zawka kalpui a tul thu a sawi a, Mizoram hriselna atana mitinte thawhho angai a ni, Mizoram Larsap chuan a ti.

He hunah hian Chief Minister pawhin thu sawiin Mizoram hrisel leh nuam zawk neih theihna tura Assam Rifles, Project HIMNA-MADAT buaipuitu te, Line Department hrang hrangte, Kohhran leh NGO te thawh hona chu fakawm tiin Mizoram chu drugs leh thil dang dan lo anga tawlhruk na kawng anih avangin fimkhur angai hle a ni, a ti a. Dan loa thil tawlhrutute manchhuaha  an phu ang ngeia hremna pek chu thil tih makmawh a ni, a ti a. Hemi chungchang hi dan hremi leh thuneitute nena sawiho angaih thu a tarlang bawk a ni.

Healthy Mizoram Campaign hi kumin June Ni 21 khan International Yoga Day hmanna AR Ground a neih ah khan Mizoram Governor Lt Gen (Retd) Nirbhay Sharma chuan a hawnga, hei hian nakum June Ni 21, 2018 thleng a huam dawn a ni. Hemi programme hnuaiah hian Yoga, Health, Healing, Naturopathy, Neurotherapy leh Drug rehabilitation-ah te hmalak a ni. Mipui hrisel zawk nan Assam Rifles te chuan Mizoram mipuite a thawhpui zel an tumthu tarlan a ni. Assam Rifles hmalak nain Mizoram hmun hrang hrang-ah  Medical Camp, Friendly Sports match, First Aid Course, Trainer te zirtirna pek leh hriselna lama ni pawimawhte a huhoa lawmna hun te buatsaih a ni tawh a ni. Kum khat chhungin camp vawihnih nei tura hmalak mek a ni bawka , batch hniha in thenin kumin Nov-Dec leh nakum March-April chhunga neih tura ruahman a ni.

Project HIMNA-MADAT (Mizoram Against Drugs, Alcohol and Tobacco) hi  New Economic Development Policy (NEDP) hnuaia Aizawl DC Pilot Project niin  ruihtheih thil laka thalaite, abik takin Upper Primary chung lamte an hima an fihlim theihna tura ruahmanna a ni a. Hemi hnuaiah hian Line Department hrang hrang H&FW, Education, Social Welfare, Anti Tobacco leh Anti Drugs abuse lama thawktu te leh Aizawl DC lama thawktute an tel a ni . A enchhin nan Aizawl District chhunga school thlan bikah  kalpui mek a ni a. He Project hi June Ni 21, 2017 khan I&PR Auditorium- ah Chief Minster Pu Lal Thanhawla’n a hawng a ni.  He project hmalakna zingah hian School naupangte hnena ruihtheih thilin a nghawng thil thalo te inhrilhhritna neih te, Anti-Tobacco/ Anti-Drugs Abuse Club School-a din te, Art Compettition buatsaih te, Pamplet, poster, sticker leh Complaint Board siam te, public education Campaign buatsaih te, Zirna in bulhnaia vaihlo leh ruihtheih thil dang zawrh phallo tura hmalak te , zirtirtu leh zirlai naupang nu leh pate  vaihlo leh ruihhlo dang laka fihlim thei tura hmalak te a tel a ni.

Vawiin meeting-ah hian Assam Rifles, H&FW Department, Education Department, Social Welfare Department, SCERT, MSACS, Mizoram State Tobacco Control Society leh Aizawl DC Office lam aiawhte an tel a ni.