Vawiin chawhnu khan S&S  Art Gallery Lower Zarkawtah Chief Minister Pu Lal Thanhawla chuan Information & Public Relations Department leh Mizoram Art Development Society (MADS) tangkawp in an huaihawt 5th Solo Exhibition of Paintings by H.K.Jerry Ramliana a hawng. 

Chief Minister Pu Lal Thanhawla chuan ram hmasawnna turin mitin ten tangkaina leh  theihna an nei vek a ti a. NEDP hmalakna atangin Mizoram chuan  Subsistence Economy atangin Market Economy nih a tum  a. Market Economy a Mizoram hlang chho turin entrepreneur te chu an pawimawh hle dawn tih a sawi a.  Kutthemthiamna chi hrang hrang neitu te zingah thiamna hlu tak nei, lemziak tute pawh Entrepreneur zingah an tel a. Eizawnna atan bakah hauhsak theihna tur leh ramin sum leh paia an intodelhna tur kawngah te thlengin lemziah chu a pawimawh  thu leh changkanna tehna pawh a ni tel a ni a ti.

"Mizo ten kawngtin rengah theihna kan neisang a, thiambik neih leh kutchhuak hmawrbawkna uluk erawh kan mamawh a. Chutih rualin Mizoram chhunga kan theihna te tan tir mai lo in hlawkna liantham neitur leh hlawhtlinna nasa zawk tawng baw tur chuan state pawnah kan theihna te kan chhuahpui a, kan tlangzarh a, midang te mit hmuh zau zawk leh ngaihnat tura inphochhuah kan thiam a ngai", a ti.

"Ramdang mi ten kan pi leh pu te sulhnu an enchak a, chutih laiin kan artist te entawn tur pipute sulhnu hlui te tihchhiat tuma hmalak tum sawrkar Department te an awm thin hi a vanduaithlak takzet a. Theihtawp a kan ven a ngai. Thasiama Seno neihna hmun, Tuirihiau leh hmun dang te siam danglam a ni thin chu a finthlak lo a,  thil pawi tak a ni. Hmundanga kan pi leh pu te sulhnu la awm chhun te hi a natural beauty anga a awm reng theihna turin leh mi ten an hlut zawk nan kan ven chhunzawn a ngai a. Pipu te sulhnu hlut nachang hrelo leh humhalh lo kan nih chuan miten hnam mawlah min chhuah ang tih a hlauhawm hle a ni ", a ti.  

Chief Minister chuan sum chu a zawn a zawn hmuh tum lova, a thawh a thawh chhuah zawk tur a ni a ti a. Artist te pawn taimakna nen hmathlir thui tak nei chunga tan an lak chuan sawrkar pawhin theihtawp a chhuahpui anga. An hmasawnna tur thil awmze nei ah chuan sawrkar pawh  thurawn an pek a,  an finchhuah thin a pawimawh hle ang a ti.

Pu H.K.Jerry Ramliana  solo exhibition vawi 5-na hawnna inkhawm hi I&PR Director Pi . Lalnithangi'n a kaihruai a. He hunah hian water colour hmanga Pu Jerry-a lemziah 48 chu lei theih tura chhawp chhuah a ni.

 

 

Attachment

  • Loading attachment...