Vawiin chawhma khan Agriculture Technology Management Agency (ATMA) Champhai Block huaihawtin Ar vulhtute tan training buatsaih a ni a. He training hi Progressive Farmer Pu RC. Dongama farm, New Champhaiah neih niin, Ar Farm din tura hriattur pawimawh chi hrang hrang - a hmun thlan dan te, a In sak dan leh Ar vulh tura thil tul chi hrang hrang bakah natna enkawl dan leh a inven dan te zirtir an ni.

Vawiin training hi Pu Lalthlamuana, Block Technology Manager(BTM) Champhai Block in kaihruaiin, ATMA in a tum ber chu kut hnathawktuten eizawnna tlinga an hnathawh te an hman theihna tura hlawk zawka kalpui dan hrilhhriat a nih thu a tarlang a. Champhai chu ran vulh nasatna hmun ni mahse, Scientific tak leh eizawnna tlinga hlawk taka vulh an tam loh thu sawiin, ran vulh chu eizawnna tlaka hmang turin leh training chu chhawr tangkai tum turin kalkhawmte chu a chah bawk.

Resource Person Pu Lalthanzauva, Veterinary Officer, AH & Vety Department, Champhai chuan Mizote chu ran vulh ngaina hnam kan ni a, ran vulh dan pawh kan hre zul a, hlawk zawka vulh dan erawh hria kan tlem hle a ni, a ti a. Sa kan ei nasat viau laiin ran vulh ah erawh kan la sang tawklo hle a, eizawnna tlinga ran vulh pawh kan awm meuh lo a, mihring taksa in sa kan mamawh tawk pawh Mizote hian kan ei pha lo nasa hle a ni tiin, taksa mamawh phuhru tur chuan ran vulh tu ten tan lak a ngaih thu a sawi a. Resource Person chuan Ar vulh chu Ran zingah hlawk zawk leh eizawnna tlinga vulh awlsam leh senso tlem ber a nih thu tarlangin, hlawhtling tak tak tur erawh chuan taimakna leh teirei peih a ngai thu a sawi a. Eizawnna tlinga Ar vulh tur chuan a tir atangin ruahmanna fel tak neih a ngaih bak ah, nunna nei an nih avangin uluk takin enkawl an ngaih thu a sawi bawk.

He hunah hian Progressive Farmer Pu RC Dongama hnen atangin a ar vulh dan leh tawnhriat a lo neih tawhte gaihthlak a nih bakah ar vulhtu dangte hnen atangin an harsatna te leh a sutkian dan tur te sawi ho na hun hman a ni bawk a. Vawiin training-a kal te hnenah hian Farmers' Hand Book "Tuikhur" tih chu sem a ni bawk.