Punjab Chief Minister Parkash Singh Badal kaihhruaina hnuaiah nimin khan Shillong khawpuiah North East State hrang hrangte pualin Regional Consultation of Sub Group of Chief Ministers on Skill Development neih a ni a, he hunah hian Labour Employment & Industrial Training Minister Pu Lalrinmawia Ralte chuan Mizoram mamawhte a thlen a ni.

Mizoram Chief Minister aiawha he meeting-a tel Labour, Employment & Industrial Training Department changtu Minister Pu Lalrinmawia Ralte chuan Sawrkar laipuia din thar, Ministry of Skill Development & Entrepreneurship hmasawnna tur leh state te tana hlawk zawka Ministry-in hma a lak dan tur rawtna te, SDIS Scheme kalpui mek tha lehzual zawka kalpui dan tura rawtna hrang hrangte leh Mizo thalaite tana Hindi thiam pawimawhna leh chumi kawnga hmasawnna atana rawtnate meeting-ah hian a thlen a ni.

“Hna hmu lo tam lutuk hi kan ram harsatna lian berte zinga mi a ni a, he harsatna sutkian hi he meeting-in a ngaihtuah tur pawimawh ber a ni” tiin he Sub Group Chairman leh Punjab Chief Minister ni bawk Parkash Singh Badal chuan India rama thalaite theihna leh thiamna chher hriam zel turin theihtawp chhuah a nih tur thu leh Chief Minister te kaltlanga state hrang hrangte ngaihdan leh rawtna te lakhawma ruahmanna tha zawk neih theih beisei a nih thu a sawi.

He meeting-ah hian Sub Group member state - Assam, Tripura, Chhattisgarh, Goa, Gujarat, Himachal Pradesh, Tamil Nadu leh Meghalaya atangin Chief Minister aiawhte bakah India hmarchhak state Chief Minister thenkhat leh an aiawhte an tel a ni.

He Sub Group of Chief Ministers on Skill Development hi Planning Commission thlakna atana din NITI Aayog governing council-in kumin February thlaa a din a ni.

Minister of State Pu Lalrinmawia Ralte hi Pu Haukhum Hauzel, Member Secretary, State Planning Board leh Pu Jacob Lalawmpuia, Deputy Resident Commissioner, Shillong te’n an tawiawm a ni.