Chief Minister Pu Lal Thanhawla chuan vawiin khan Mizoram University Campus, Tanhrilah Auditorium changkang tak a hawng.

Chief Minister chuan Mizoram University in zirna ruangam tih hmasawnna hna an thawhna a tan an lakna chu lawmawm a tihthu a sawi a. School of Social Sciences Building a hawn tum pawhin an hnathawh chuan mit a tlung hle a ni a ti a. Auditorium hawn tak hi University Grants Commission puihnaa sak anih thu sawiin, khawvela technology lam intlansiakna a tel pha tura zirna in sang tih changtlun chhoh zel chu a tum ber pakhat a ni a ti a.Auditorium duan dan chu a mawiin, thil chi hrang hrang tih nan pawh a remchan hle a beiseiawm a ni a ti.

Chief Minister chuan Mizoram University hi Central University anih angin Mizoten kawng tam takah kan tangkaipui hle a ni tiin, kum engemawzah kalta chhunga hmasawnna namenlo hmuh theiha a awm chu a thawktuten zirlaite hmakhua an ngaihpawimawhzia a tilang a ni a ti a.

Chief Minister chuan India rama Korean Ambassador in March 2015 a Mizoram a rawn tlawh tuma a tum pakhat, Industrial Corporate Social Responsibility Wing kaltlanga Mizoram sorkar nena Mizoram University chhungah ‘Skill Development Centre’ din tum anih thu a sawilang a. Hei hian zirlaite chu thiamna leh theihna chherchhuah kawngah nasa taka a puih theih ngei a beisei thu a sawi a ni.

Chief Minister chuan hetiang building tha sak theih anihnaah central sorkar chungah lawmthu a sawi a. Mizoram University thuneitute, zirlaite leh midang dangte chu he Auditorium hi uluk tak leh fai taka enkawl a nih reng theih nan tha thlah lo turin a chah a ni.

Mizoram University Vice Chancellor Prof. R.Lalthantluanga chuan kalkhawmte lawmna thu sawiin, Chief Minister-in hun remchang a neih sak thei chu lawmthu a sawi a. Hawnna inkhawm avanga class kallai tih khaihlak an duh loh avangin sawmbik faculty member leh zirlai thenkhatte chauh hawnnaah hian an kal a ni a ti a.

Auditorium hi pawnlam mite pawhin an hman ve theih tur thu sawiin, dan erawh zawm tur a awm ang a ti a. Uluk taka enkawl chhoh angaih dawn avangin, hlawkna duh vang niloin a hming chauhin hman man pawh siam a ni ang a ti. Auditorium hi 11th Plan Fund hnuai atanga sak a ni a. Senso zawng zawng ruahman chu Rs.1170/- lakhs niin, work order zat erawh Rs.1022.70 lakhs a ni a. A sak hna hi 10th Oct 2011ah bul tan a ni a, ni 30th March 2015 khan zawh fel a ni a, Senso zawng zawng, site development leh parkingna tiamin Rs.1316/- lakhs senral a ni. Auditorium ah hian mi 864 lenna seat siam a ni a, a zau zawng hi 1742 sqm a ni. A building hi Heating Ventilation & Air Condition a ni a, 200 KVA DG set dah a ni bawk a. Kangmei thelhna hmanrua dah bawkin, accoustic, stage lighting, sound system leh stage furnishing tih vek a ni bawk.Auditorium satu contractor hi M/S Brahmaputra Infrastructure Ltd., Guwahati, Assam a ni.

Hawnna inkhawm hi Pu Zothankhuma, Registrar, Mizoram University in a kaihruai a, Prof Lianzela’n lawmthu a sawi bawk a ni.

Attachment

  • Loading attachment...