Vawiin khan DC Conference Hall-ah Champhai District Bawrhsap Pu Vanlalngaihsaka hovin Krismas leh Kumthar lo thleng tura Champhai mipui ten boruak muanawm tak hnuaia an hman theih nan Dan leh Thupek chungchangah meeting neih a ni.

DC Pu Vanlalngaihsaka chuan Krismas leh Kumthar felfai taka hman a nih theih nan theih tawp chhuah turin kalkhawmte chu a sawm a. Mipuiin muanawm leh hlim taka he hun hman kan tum rual hian midang tana hnawksak a khawsa kan awm loh nan mitin kan fimkhur erawh a tul a tih thu leh, dan leh thupek kengkawhtu tur ten an mawhphurna tha taka an hlen a beisei thu a sawi a ni.

He meeting a thu rel zingah hian hunpui laia halpuah leh bengchheng siam thei chi reng reng khap te, kawngsir a thilzawrh phallohna hmun leh mihring kalna (footpath)-a inpho te khuahkhirh chungchangte, lirthei leh a kaihhnawih chungchangah khauh zawk a Dan kalpui te, Medical Staff-te mamawh huna pan mai theih leh biak pawh theih nan a hmalak te a tel a ni. Traffic leh Excise-te bakah YMA leh VC tin te chanvo leh mawhphurhna hrang hrang tur sawiho niin, faina kenkawh leh bawlhhlawh paihna hmun baka lo paih chungchangah te fimkhur tur inchah a ni.

Vawiin meeting-ah hian Dan leh Thupek kengkawhtu lam department hrang hrang te, Tlawmngai pawl hrang hrang leh Khawtlang hruaitute an kal khawm a ni.