Vawiin ni 11th December, 2015 hian Pu Lal Thanzara, Health Minister, Adviser, Disciple Society ni bawk chuan Discipleship Training Institute (DTI) Neihbawi-ah Training chhuakte hnenah Certificate a sem.
He Graduation Day programme, DTI Chapel-a inkhawm urhsun tak buatsaih hi, Dr L.Ringluaia, Chairman Disciple Society ni bawkin a kaihruai a ni.
Pu Lal Thanzara, Minister chuan Graduation Day hmangtu te chu duhsakna chibai bukin thawktute leh Training chhuakte chu duhsakna a hlan a. He hun kan hman mek hi Sawrkar programme ni lovin Lalpa programme a ni tiin a ropui takzet a ni a ti. Training chhuakte chu he training-na hmunah hian eng eng emaw chhan hrang hrang avanga lo kal pawh ni ula, Pathian thu tha tak tak in dawnte in nunpui a inzawm tlat chuan a tha hle dawn a ni a ti a. Ruihtheih thil vang a ni emaw, chhungkaw buaina vang emaw pawh nise Pathian tanpuina in in sim theih ngei ka beisei tlat a ni a ti a. Minister chuan tunlai khawvel sualna pun zelnaah hian in hmalam hun chu nangmahni kutah a in nghat a ni tiin fimkhur taka nun hmang chho zel turin a chah bawk a ni.
Minister Pu Lal Thanzara hian Certificate te a sem zawhin tawngtai sakna hun a hmang bawk a ni.
He Graduation day-ah hian Rev K.Lalrongheta, Principal in tun course kal meka an hmalak dan reports pe in zirlai aiawh leh nu leh pa aiawhin thusawi ngaihthlak a ni bawk.
He Graduation Day, vawiina hman hi Batch 52-na niin tun tumah hian Certificate of Theology (C.Th) mi 8 leh Certificate of Discipleship (C.Dis) mi 11 te hnenah Certificate hi hlan an ni. Discipleship Training Institute (DTI) hi ni 5th October, 1988 ah din niin he institute atang hian mi sangkhat chuang an lo training chhuak tawh a ni. Tunah hian thawktu, zirtirtu pathum (3) leh non-teaching staff pali (4) an awm mek a ni.
