Kumin March thla a Zokhawthar Land Customs Station hawn a nih hnu a hmasawnna leh hmalak belh ngai awm te a hmunah enfiahin Pu Joseph Lalhimpuia, Parliamentary Secretary, Trade and Commerce chuan nimin (10.12.2015) khan Land Customs Station a thawktute nen inkawmna a nei. He hunah hian Champhai DC Pu Vanlalngaihsaka leh Trade and Commerce Department-a hotute an tel a ni.

Zokhawthar Land Customs Station kaltlanga India leh Myanmar insumdawn tawnna kalphung "Barter System" hnuaia bungrua chi hrang hrang 62 chauh hmanga sumdawnna kalpui thin chu kumin December ni 1 atang khan Sorkar laipui chuan "Normal Trade"-ah a rawn thlak a. Normal Trade hnuaiah hian Dan in a phalloh thil a nih loh chuan insumdawn tawnna atan hian bungrua eng chi pawh phal a ni tawh a ni.

Parliamentary Secretary chuan Normal Trade a thlak a nih takah chuan sumdawnna pawhin hma a sawn phah viau tura a rin thu leh, ram pawhin a hlawkpui ngei a beisei thu a sawi a. Chutihrual chuan tuna kalphunga kan lo neih tawh tam tak hi chu siamthat ngai a awm a rin thu Pu Joseph Lalhimpuia chuan sawiin, bungrua lut chhuak zat leh chhiah chawi zat chungchangah te chhinchhiahna mumal tak neih a pawimawh thu a tarlang a. Ram dang nen insumdawn tawnna hi thang zel mah se ziaka tilang chiang turin record mumal a awm siloh chuan Sorkar laipui atangin ngaihpawimawh kan hlawh lo palh thei a ni, a ti a ni.

Zokhawthar Land Customs Station-a Inspector Pu Anal Wangsul chuan Normal Trade hnuaia kalphung thlak hrang hrangte a sawifiah a. Myanmar Sorkar insiksawi hun lai anih avangin an sumdawngte tan registration mumal taka peihfel a la nih loh avangin rawn lut tur an la tam loh thu te a tarlang a. India rama Company lian tak takte pawhin Zokhawthar kaltlang hian an bungrua ram pawn a hralhchhuah an duh tawh thu te tarlangin, ram pahnih ten he lai hmun panna tur a kawng laih hna an thawh mek te hi peih fel a nih hnu chuan Zokhawthar LCS hi a let tam takin a lun tur thu a sawi a ni.

Tun dinhmunah hian Zokhawthar LCS ah hian warehouse pakhat chauh a la awm a. Warehousing Station-a puan a nih tawh angin bungrua tawih thei leh theilo te, ei chi leh ei chi lo te thliar a warehouse hran a dahna tur siam belh a la ngai dawn a. Thlai leh ei tur thil lo lut te chu India ram dan in hrisel tawka a puan standard an phak leh phakloh te enfiahna tur centre changtlung zawk te, bungrua bik kalna tur bridge lian zawk te, bungraw rih zawng bukna tur weighing bridge siam te chu hmabak la awm thenkhat a ni.

Nimin Parliamentary Secretary-in LCS a tlawh pah hian Zokhawthar-a School hrang hrang zirtirtute a kawm nghal a. Khawtlangin zirna an ngaihpawimah vanga tangrual taka hma an lakna te chu lawmawm a tih thu a sawi a ni.