Hmuifang khua kum 100 tlin lawmna, Hmuifang Centenary chu vawiin khan  Hmuifang Community Hall-ah neih a ni a, Chief Minister Pu Lal Thanhawla chuan a hmanpui.

Chief Minister chuan Mizoram buai laia khaw khawm anih thin avanga kum za hmang theilo khaw tam tak an awm laia Hmuifangin kum za a tling chu, khawdang kum 100 tling tawhte ang bawkin Pathian kaihhruaina avanga thleng an ni tih hriat a tha tiin, an vannei bik hle a ni a ti a. Khaw tin hi kan pawimawhna a inang vek a, khaw te nih vanga timna tur a awm lova, khaw lian nih vanga uanna tur a awm bawklo a ni a ti a. A pawimawh ber chu khaw inlungrual, khua leh a neitu fai leh khaw intodelh nih hi a pawimawh ber a ni a ti.

Chief Minister chuan Hmuifang hi zinmite paltlang nasat tur an nih avangin a mi chengte chu midangte entawn tlaka awm turin a chah a. Ram pawn leh chhunga zin miten an tlawh chakna tura cheibawl rem tak anih avangin sorkar pawhin ngaihtuahna a hmang mek a ni a ti a. A khaw thenawm Sialsuk khua pawh tourist te hip thei tura cheibawl theih anih thu a sawi bawk a. Thenzawla golf course siam tum mek pawh central sorkar-in a siamna tur Rs.57 Crore a rawn sanction tawh thu a sawilang a. Hmuifang khaw mipuite chu an khua cheibawl anihna turin an ram leh phul mawi tak takte chu humhalh tlat turin a chah a ni.

Chief Minister hian Hmuifangin kum 100 a tlin hriatrengna tur lungphun (monument) hawngin souvenir a tlangzarh bawk a. Hmuifang VCP hnenah kum 100 tlin lawmpuina citation a hlan bawk.

Chief Minister nupui Pi Lal Riliani, President, IST&H, Mizoram Chapterin Hmuifang khaw mi tangkai bikte hnenah lawmthu sawina citation a hlan bawk a. Hmuifang khaw mipuiten Chief Minister-te nupa hnenah duhsakna thilpek an hlan bawk a ni.

Bialtu MLA Pu KS Thanga, Parliamentary Secretary chuan hun lokal turah Hmuifang chu tourist centre atan tintuah a nih thu a sawi a. Kan tlangmawi tak takte leh khampangte hi zin mite hip thei tura cheibawl theih an ni tiin, a khaw mipuite eizawnna lam pawh hemi zawnga kalpui a tul dawn a ni a ti.

Hmuifang khua hi British-in min awp laia Aizawl bawrhsapin ran vulhna hmun atana khaw din alo phalsak khua a ni a. Tunah hian chenna in 60 vel awmin mihring 300 chuang hret an awm mek bawk a ni.

Lawmna inkhawm hi Pu H.Lalremruata, Chairman, Centenary Organising Committee in a kaihruai a ni.

 

 

Attachment

  • Loading attachment...