Tukin zing khan New Secretariat Complex Aizawl-ah Health Minister Pu Lal Thanzara’n Long Lasting Insecticidal Nets (LLIN)  Malaria venna atana Damdawia chiah Thosilen, thingtlang lama sem tur te a vai liam.

District tina sem tur thosilen damdawia chiah sa (LLIN) vai liamna hun tha tak an hmang thei chu lawmawm a tih thu sawiin kan ram boruak angah  chuan Malaria Thendarhtu thosi Anopheles te hi sik leh sa leh ruahtui tlak dan in a zir avangin an in thlah pung chak em em a. Health Department chuan Malaria laka inveng turin kawng hrang hrangin nasa taka hma a lak na zinga pakhat, Damdawia chiah thosilen sem hi a ni a tiin Khuallian Pu Lal Thanzara chuan Mizoram hi sikserh tamna state zinga mi  kan tel a, nikum 2014-ah Malaria vei mi 23,105 awmin mi 31 ten nunna hlu tak an chan a. Kumin October thla thleng hian Malaria vei mi 22,064 awmin mi 13 ten nunna an chan leh bawk a. Kum hmasa ai chuan tlem chuan hmasawnna kawng khat a awm a. Thawktute thawh rim naah hlawhtlinna a lang thei hi lawmawm a tih thu a sawi.

Sap thufing chuan Prevention is better than cure ‘tihdam aiin inven a tha zawk’ an lo tih thin chu a dik zia sawiin Health Minister chuan Mizoramah Medical College te din tum a  nih lai  leh damdawiin tih changtlun kawnga hma lak mek a nih lai hian inven lam kan ngaihsak si loh chuan natna pumpelh  kawngah kan him dawn lo va, hriselna  lamah hmasawnna duhawm kan nei thei dawn chuang lo a ni tiin mi mal tin leh chhungkaw tin ten tih theih leh mawhphurhna kan neih te hre thar lehin Health Deptt. ten kawng hrang hranga an hmalakna puibawmin tan lak tlan a ngai a ni a ti a. Malaria laka inveng tur chuan mitin ina kan tih theih thosilen tha taka zar hnuaia mutte, thosi pian theihna tuitling tihbo te, kan in leh a vel vawn faite leh DDT-a kan inchhung kah tir a pawimawh thu a sawi bawk.

He LLIN hi Global Fund-in National Vector Borne Diseases Controol Programme (NVBDCP) Govt. of Indias kaltlanga thosilen naran pawh ni lo, thosi ti hlum thei damdawia chiah sa nuai nga chuang (5,28,108) min pe hi a lawmawm tak zet a ni tiin Khuallian chuan khawrtinah ni lovin Malaria tamna khua ni a hriatah te sem a ni dawn a. A sem dan tur pawh ruahmanna tha tak siam a ni tawh a. Lo pawh pen a rem dawn lo va, a dawngtu lam pawhin pek an nih chhan hre rengin he thosi len hi an zar ngei tur a ni tiin record fel taka vawn tur a ni a. Chu chu endik leh vek tur a nih thu a sawi a. Health Department hmalakna programme dangah pawh Mizoram hi a titha pawl tak niin hma pawh kan sawn zel a, hminghliau palh tur inven reng a pawimawh a ni a ti bawk.

Dr. K.Ropari, Principal Director Health & Family Welfare pawhin thu sawiin LLIN hi kum 2011 atanga sem tan a lo nih tawh thu leh tuna sem leh theiha a awm chu lawmawm a tih thu sawiin thenkhat tan thosilen lei mai a har a. A thlawna dawn theiha a awm chu a lawmawm tak zet a ni a ti a. LLIN hi size  chi hrang pathum sem  chhuah tura  ruahman a ni a. He thosilen damdawi chiah hian kum 5 chhung a daih a. Kum 5 chhung hian vawi 20 aia tam suk loh hram tur a niin a aia tam suk chuan a damdawi kha a ti bo thei a ni tih a hmangtu ten hriat reng a ngai a ni a ti. Thosilen te hi NVBDCP leh Global Fund te duh angin a semtu tur te hi ASHA leh CHV te an ni dawn a. A tul dan ang zelin Health Deptt. Staff ten kaihruaiin an enpui reng dawn a ni a ti bawk.

Inkhawm kaihruaitu Dr. Lalbiakkima, Director Hospital & Medical Education chuan  Health Department te hnathawh hrang hrang ngaihvena hriatpuitu tha tak Minister an neih ah lawmthu sawiin Hmasawnna tam tak an la neih belh zel pawh a beisei thu a sawi a. LLIN chungchang sawifiahin Malaria laka inveng tur hian LLIN sem leh dawn ringawt a tawk lo tih hria a tih tur dang tam taka awm te hi mipui ten theih nghilh lovin malaria leh natna dangte do tura chhungkaw tin leh khawtlang tangruala thahnem ngai turin a ngen nghal a ni.

District hrang hranga kal chhuak tur motor lian 9 ten LLIN thahnem tak an phur chu Health Minister Pu Lal Thanzara hian a vai liam a ni.