Vawiin chawhnu dar 2:00 khan I&PR Conference Hall, CHANEM Building ah State Bank of India, Champha Branch huaihawtin Champhai District chhunga Zokhawthar leh Ngur khuaa Loneitu thlanchhuah mi 60 pualin Kishan Credit Card (KCC), Kharif Season Campaign, Mega Camp buatsaih a ni a. He inkhawm hi SBI Champhai Branch Manager Pu Lalchankima Pachuau chuan kaihhruaiin Champhai District Bawrhsap Pu Vijay Kumar Bidhuri chu khuallian niin Loneitu thlanchhuahte hnenah hian KCC hi a sem chhuak a ni.

KCC semchhuah inkhawm ah hian thu sawiin khuallian Pu Vijay Kumar Bidhuri chuan Mizoramah Loneih (agriculture) chu thingtlang mite eizawn leh sum lakluh nan te, retheihna umbo nan mai piah lamah intodelhna atan a pawimawh em em a. Loneih lama hmasawnna avangin kan khawsak, ei leh bar dinhmun leh khawtlang dinhmun nasa takin a kang a ni a ti a. Tun hnaiah khawpuia cheng an pung chak hle a, mihring kan pung nasa a, thlai thar chhuah hralhna tur pawh a tam chho zel a, hei hian thlai thar chhuah hralhna tur tha zawk a siam chhuak nasa hle a ni a ti. Thingtlang hmasawnna atana pawimawh ber chu Loneih a ni a, loneih hi sum leh pai hlawh chhuahna, retheihna umbo na leh ei leh bar min petu a ni. Loneih lama hmasawnna hian changkanna nasa tak a thlen mek a, sum dehchhuah kawngah pawh nasa taka sulsutu a ni a ti.

Loneih hi India ram mipuite innghahna ber a ni a, mipui 80 % chu loneih leh a kaihhnawiha innghat tlat kan ni a. Chuvangin sorkar chuan lonei mite hmakhua a ngai em em a ni a ti a. India rama sum khawih chet rel dan hi Bank kaltlangin a ni ber a, loneih lama hmalate sum leh paia tanpui kawngah Bank hian dinhmun pawimawh tak a chelh a. Kum 1969 a Bank tam tak Nationalised a nih khan Agriculture Sector hi ngaih pawimawh bik tur sector a dah a ni a. Ram chhunga commercial bank te chu net bank credit atangin 18 % agriculture leh a kaihhnawih hmalakna dah tura hriattir an ni a ti. India sector in commercial bank te RRB te leh cooperative te chu kum 2004 atang khan kum 3 dan zelah a leta he credit hi tipung turin thu a pe bawk tih a sawi a. Kum 2006 atang khan agriculture sector hnuaia tanpuina sum interest scheme tha tak a duang chhuak bawk tih a sawi a. Loneitu kalkhawmte chu an sum puk tur chu dik leh tha taka hmang turin a chah nghal bawk.

SBI Champhai Branch Manager Pu Lalchankima Pachuau pawhin thu sawiin loneitu kalkhawmte chu an loan lak tur chu a thlawna dawn tur a nih loh avangin dik tak leh taima taka, tangkai taka hmang theuh turin a chah a ni, midangte tana harsatna siamtu nilova an loan lakte tha taka rul turin a chah bawk a ni.

He hun hi SBI Regional Manager Pu Sankar Gope chuan Aizawl atangin a rawn hmanpui a. SBI Champhai Branch Manager hi Champhai Lead Bank Chief Manager Capt. Vijay Kumar Ojha chuan a tawiawm a ni.