Vawiin chawhma dar 11:00 khan Lunglei Circuit house ah District Level Vigilance & Monitoring committee meeting chu Lok Sabha MP Pu C.L Ruala leh Rajya sabha MP Pu Lalhmingliana te kaihhruaina in neih a ni. MP te hi Lunglei HPC Vice Chairman Pu Joseph Lalhimpuia leh Bawrhsap Pu V.Sapchhunga, IAS, ten an tawiawm a ni. He meeting ah hian District a hmasawnna tur a sawrkar ruahmanna kalpuitu Programme Implementing Agencies (PIA) te hmalak tawhna enfiah na hun leh hmathar lak tur te zir chian a ni.
Pu C.L. Ruala MP chuan sawrkar in mirethei te chhawmdawl nana tanpuina sum a ruahman chu tangkai leh remchang thei ang bera hman a ni tur a ni a ti a, mipui te chanvo sum lo pawh pen chu eng ti zawng a sawi mam pawn corruption tho anih thu a sawi. MGNREGA thil tum ber chu mipui hnathawh tur neilo tana hnathawh tur siam sak a nih rualin eizawnna kumhlun insiamsak erawh a theih lohva chuvang chuan mipui vantlang tana rotling thil MREGA sum hmang hian siam hram hram tum a ngai a ni a ti.
Pu Lalhmingliana MP(RS) chuan tui in tur lo tlem ta tial tial chu kan tui tlan lui hnar thiah kan chin vang leh ramngaw chereu tak vang a nih thu a sawi a, MNREGA sum enkawltu BDO, VC te, YMA, PHE department leh Forest Department te an tanrual chuan he harsatna hi a zia awm thei a ni a ti.
HPC Vice chairman Pu Joseph Lalhimpuia chuan District hrang hrang a sawrkar in hmasawnna tur a programme a siam ah a dawngtu tur mipui vantlang te an chian a ngaih thu a sawi a, vantlang tana tangkai tak kan mamawh em em si kan neih loh lai in, vantlang thil thenkhat chu kan mamawh aia tam daih kan neih a awm teuh a ni a ti.
Vawiin metting hi 2012-2013 financial year ah thutkhawm hmasaber a ni a, MNREGA, IAY, SGSY, IWMP, PMGSY, NSAP, ARWSP leh TSC kaltlanga hmalakna te endik niin, chakzawk a sawrkar hmalakna kalpui dan tur relho a ni.
MNREGA,IAY leh SGSY a hmalakna te Pu V.Lalsangliana, PD, DRDA in a tarlang a, MNREGA bikah 2011-2012 chhung in JOB CARD 32965 neitu ten ni 100 inhlawhna an nei hman a, kum 2012-2013 chhung atan JOB CARD 33008 siam a ni. IAY tanpuina sum Rs. 241.97 lakh hmangin in thar 431 leh in hlui siamthat 348 hna thawh a ni a, IAY tanpuina ah hian mi khawsak harsa (BPL) ten Rs.48,500/- in thar sak na leh Rs.15,000/- in hlui thawm that nan an dawng thei. Project Director hian IAY sum dawngtuten IAY sum dawng duh tho siin IAY LOGO an tarsak leh thin a, hei hian central atanga sum dawn a ti harsa thei a ni a ti.
SGSY tanpuina sum Rs.135.613 lakh chu mimal leh pawl te hnenah ei zawnna kawng a tanpuina atana sem ral a ni a, Integrated Water Shed Management Prog. (IWMP) a hmalakna te Soil Dept., Horticulture Department, Agriculture Department leh AMFU ten report an pe a, Tui khawlna Water Tank, Tui lakna (Irrigation), Terracing leh Plantation atan te a hman an ni. PWD Engineer te chuan Lunglei District chhungah April 2012 thlenga PMGSY hmanga kawng 140.055 Kms. laih nan Rs. 3259.49 lakh. senral a nih tawh thu an sawi a, PHE official te pawn thingtlang khaw 30 a tui thianghlim lak luh nan Rs. 750.11 lakh. an senral tawh thu an tarlang.
