Ramri hrula venhim hna thawk sipaite tlawh a Hmarchhak bial state pathum – Nagaland, Mizoram leh Meghalaya fang kual mek Sawrkar Laipui-a Minister of State for Home Affairs Pu Jitendra Singh chuan lang in vawiin khan Aizawl a rawn tlawh a.

Chawhnu lam khan Chief Minister Pu Lal Thanhawla leh Pu Jitendra Singh te hian Chief Minister Bangla-ah inkawmhona hun tha tak neiin venhimna chungchangte leh Police Modernization chungchangte an sawiho a. Chief Minister hian Union Minister hi Khumbeu leh Mizo ipte a hlan bawk a ni.

Union Minister hi tukin khan helicopter in Kohima atangin Aizawl a rawn thleng a. Thuampui Helipad ah Union Minister hi Mizoram Sorkar mi pawimawh – Home Secretary, DGP, DC Aizawl, SP Aizawl leh Officer dangte; BSF IG(Officating) Mizoram & Cachar Sector, DIG SHQ, Mizoram leh an thawhpui dangte; DD SIB leh Assam Rifles DIG ten an lo hmuak a ni.

Zing lamah BSF hmunpui Durtlang-ah Union Minister leh BSF hotuten meeting an nei a. Hemi hnu hian Minister hian BSF Composite Hospital Durtlang-ah BSF sipai damlo te kan in, an hriselna chungchangte a zawt a, thilpek a hlan theuh bawk a ni. Hemi hnu hian Union Minister chuan Congress Bhawan a tlawh bawk.

Vawiin vek khan Union Minister chuan helicopter in Demagiri, Keslan, leh Phuldungsei-a BSF Border Out Post (BOP) te chu a tlawh leh a. Zanin hian Phuldungsei BOP ah riak tura beisei a ni a. Naktuk khian CIJW Vairengte a tlawh hnu in Karimganj-a BSF hmun te a tlawh leh ang.