Vawiin khan Parliamentary Secretary Pu S.Laldingliana chuan cheng nuai 63.49 senga sak zawh tak Lunglei District Sports Office Building thar a hawng.

Sports Office building hawnna inkhawm buatsaih Pu R.Lalvena, Secretary SYS kaihhruaiah Pu S.Laldingliana chuan thawktu fel tak takte inpekna vanga building thar neih a lo ni ta chu lawmawm tak zet a, sorkar chuan thalaite khawhawi leh an khawvel hriatthiampuiin infiamna kawnga hmelthar hmu chho zel chu lawmawm a tih thu a sawi. Sports Discipline hrang hrang hmanga sorkarin thalaite theihna phho chhuak turin tan a la nasa em em a, chutih lai karah hetianga building thar duhawm tak kan nei ta hi a lawmawm tak zet a ni, a ti. He building thar hian infiamna kawng tinrengah Lunglei district tan rah tha chhuah zel se a duh thu Parliamentray Secretary chuan a sawi bawk.

Lunglei District Sports Office Building hi EE, Lunglei Division PWD enkawlna hnuaiah December ni 10, 2010 atanga sak tan a ni. Hawnna ikhawmah hian he hna enkawltu Er. Lalthanzuala, EE, Lunglei Building Division chuan technical report kimchang tak a pek bakah Pu Lalzirmawia, Director SYS pawhin thu sawiin Building thar peihfel a ni ta chu Department tan mellung thar a ni, a ti.