4607/2024-2025

Champhai, 11th March 2025: Vawiin chawhnu dar 02:00 khan Champhai Bawrhsap pisaah Bawrhsap thar Pu Mohammad Aaquib leh Mizoram Journalist Association, Champhai District member te an inkawm a. MJA Conference vawi 51-na Champhai khawpuia neih tur chungchang bakah mipui vantlang nghawng thil pawimawh hrang hrang te an sawiho a ni.

Champhai Bawrhsap Pu Mohammad Aaquib chuan MJA te nen inkawmna hun ṭha tak an nei thei chu lawmawm a tih thu a sawi a. Thuthar lakhawmtute chu Democracy innghahna lungphum pawimawh tak an nih angin theihtawp chhuah zel turin a fuih a. Bawrhsap chuan sawisel ngai ni a an hriat te sawisel a, rawtna leh thurawn an neih te thlen zel tura chahin, an thurawn te dawngsawng turin an inpeih reng thu a sawi bawk a ni.

Champhai District MJA te hi an President Pu Lalhlupuia’n a ho a. Ram pum huap MJA Conference vawi 51-na, March ni 26 a Champhaiin a thleng tur chungchang te, khawpui faina chungchang te, khaw chhung kawngpui venghim tura Road Protection Squad tharthawh leh chungchang te bakah thil pawimawh hrang hrang te an sawiho a ni.