4608/2024-2025

Aizawl dated 11th March, 2025: Vawiin chawhnu khan Women & Child Development, Government of Mizoram chuan International Women’s Day Lawmna leh Zakapa Award semna hun Dawrpui Multipurpose Centre, Dawrpui Aizawlah an buatsaih a. He hun ah hian Pi Lalrinpuii, Minister, SWTA & WCD chu khuallian niin Pi Baryl Vanneihsangi, MLA leh Pi Prova Chakma, MLA te chu khual zahawm an ni. Pi Lalzarmawii, IAS, Commissioner & Secretary, SWTA & WCD chuan hun kaihruaiin hun tangkai leh hlawkthlak tak hmang turin kalkhawmte duhsakna a hlan a ni.

Khuallian Pi Lalrinpuii chuan NITI Ayog-in Sustainable Development Goal Index a tihchhuah enin hmeichhiate dinhmun tehfung awmna SDG 4 te en chuan Mizo hmeichhiate dinhmun chawisan kawngah hmabak thui tak a la awm thu a tarlang a. Hemi kawnga hmasawn tur hian chhungtin a mipa leh hmeichhia tanrualna a pawimawh thu a sawi. Social Welfare Minister chuan International Women’s Day lawmna pual a Mizo Lal huaisen, hmeichhiate humhimna kawnga thawhhlawk tak, Zakapa hming chawi a Award siam leh hemi kawng a lawman hrang hrang buatsaih dawng thei tur a hmeichhiate dinhmun chawisan kawng a hma latute chu lawmpuina leh duhsakna a hlan thu sawiin he award hian hmeichhe dinhmin tihhmasawn leh chawisanna kawngah awmzia thui tak a neih ngei a beisei thu a sawi bawk a ni.

Pi Zoramthangi Chhangte, Director, Women & Child Development chuan hemi programme hman a nih dan te leh department inpuahchah dan te, ruahmanna hrang hrang an siam dan report pein President MHIP Gen Hqrs chuan Woman’s Day puala thutiam sawi rualna a kaihruai a. Zakapa Award semna Ceremony ah hian Dr Laltluangliana Khiangte, Pi Zoramthangi Chhangte, Pi Lalrinpuii leh Dr Lalrinawmi Ralte te’n thusawina hun an hmang bawk a. Pi Zonunpari Sailo, Joint Director Women & Child Development lawmthu sawina hun a hmang bawk a ni.

Women’s Day lawmna ah hian Mizo hmeichhia, Local Council-a Term 3 (2015, 2020 & 2025) lo tling zawn tawh te, Sports lam a Mizo hmeichhiate hming tithatu mi 8 te, kum 2021 – 2024 inkar a STEM (Science, Technology, Engineering, Mathematics) Education-a  titha hmeichhia College Topper mi 3, Mizo hmeichhiate zinga a hmasa ber nihna hauhtu mi 5 bak ah sumdawnna lam a anmahni thiamna hmang a eizawnna bul tantu mi 2, an vaiin hmeichhia 33 hnen ah chawimawina leh lawmpuina hlan a ni. Zakapa Award hi Pi Khawlrinpuii, Khatla South hnen ah hlan a ni. Pi Khawlrinpuii hi February 14, 1959 khan Arte khuaah lo piangin, a fate nen Khatla South ah hian an cheng mek a ni. Lehkah zir sang lo mah se, hmeichhia leh naupangte humhalhna kawng ah theihtawp chhuahin hma a la thin a, hetiang lam hawi training ATI-in an buatsaih ahte pawh a tel ve hram hram thin a ni. Thenawm khawveng ah nupa buai te, fa inchuh te leh harsatna dang a awm pawh a an koh ber a ni thin a, hmeichhia humsual dai Home a dah ngai buaipui te, naupang Home-a dah te leh a tul dan ang a FIR thehluh te leh midangte himna tur a Child Welfare Committee, Women Commission leh Home hrang hrang tlawh te hi a hnathawh langsar deuh deuhte an ni a. Heng a hnathawh that avang hian MHIP Khatla leh MHIP Gen Hqrs te pawhin chawimawina an lo hlan tawh a ni. Vawiin a chawimawina dawngtute chu a hnuai a tarlante hi an ni;