4609/2024-2025

Dated Serchhip, the 11^th March, 2025: Vawiin khan Chief Minister’s Bana Kaih Scheme hnuaiah khawl thar siamtute tan Inventors’ Challenge Serchhip DC Meeting Hall-ah buatsaih a ni a, he inelna atan hian Khawl siam dan tur idea chauh emaw, khawl siam tawh (prototype) emaw pawh pawm niin, mi 7 in an thil siamte an entir a ni.  

Additional DC Pu Lalrinzuala chuan Inventors Challenge-a telte inbuatsaihna hun chep tak kara an tel chu lawmthu a hrilh a, an thiamnate ram leh kawtlang tana hlan zel turin a chah.Tun tuma inelna hi a bul tanna chauh ni sela, mi la siam chhuah ngai loh thil tha zawk la siam chhuak zel tura tan la zel turin a; An thil siam leh an hralh chhuahte, hlep an neihte thlengin ziaka tha taka vawn nachang hriat a pawimawh thu a sawi bawk. 

Pu Lalrinzuala kaihhruainain endikna neih nghal niin vawiin vek khan lawmman sem nghal a ni a, lawmman dawngtute chu- Pakhatna- Lalhruaitluanga, New Serchhip niin lawman Rs. 25000 hlan a ni a, pahnihna- Lalchhuangliana, Serchhip hnenah Rs.15000  leh pathumna- J. Lalremruata, Chhiahtlang hnenah Rs. 10000 hlan niin State Level inelnaah an tel chhunzawm dawn a ni. Anni bakah hian Consolation prize mi 4 hnenah pek an ni. 

He hunah hian Pu Laldawngliana, Sr. EE, P&E Serchhip, PC Zokhuma, Sr. EE PWD Serchhip bakah Mizoram Science, Technology & Innovation Council atangin Pu R. Vanneihtluanga leh Pu GC Lalremruata ten endik hna an thawk a ni.