4606/2024-2025

Lunglei, 2025 Vau thla ni 11: Vawiin khan Lunglei Municipal Council (LMC) hnuaia local council (LC) member-te tan Lunglei Convention Centre-ah an hna thawhna atana thil pawimawh hrang hrang zir hona training buatsaih a ni.

He hun hi LMC Chief Executive Officer (CEO) Pu Donny Lalruatsanga chuan kaihruaiin, inlawmna thu a sawi a. LMC Chairman Pu Lalzuithanga chuan training hi hawngin, tun hmaa VC (village council) ni ṭhin kha LC a lo nih takah chuan kalphung tam tak thlak danglam a, thil thar hman a ngaihna tam tak a awm tawh avangin inzir belh zel a ṭul a ni, a ti a. Mipuiin an ai awh tura an rin avanga an thlan an nih ang takin, party rilru dah ṭha a, inlungrual taka khawtlang enkawl turin LC member-te chu chahin, LC intodelh ni tura sum hman thiam zir tur te, khawtlangah LC anga hma lak theih loh chin a awmin LMC lamah a rang lama thlen nachang hre tur leh ward tinah LC hna thawhte rel tura ward committee din a nih angin an thu leh hla la thiam tur te'n a chah a. LMC-in khawpui faina chungchangah leh lirthei park dan chungchangah hma a la chho mek tih sawiin, sanitation leh traffic chungchanga LMC hma lakna hrang hrangah LC tinte'n ṭhahnem ngai taka thawhpui turin a sawm bawk a ni.

Vawiina training hi hun hnihah ṭhen niin, hun khatnaah hian LMC CEO Pu Donny Lalruatsanga chuan Parking Fee/ Parking Regulation chungchang, Executive Councillor Pu Zorinsanga Hmar chuan Property Tax/Urban Local Body Grant chungchang leh Executive Councillor Pi Lalhruaitluangi Sailo chuan Licensing Regulations/Hoardings Regulations chungchang te an zirtir a. Hun hnihnaah CEO Pu Donny Lalruatsanga'n Role of Local Council chungchang zirtirin, FAO Pu Lalmawizuala'n Urban Local Body Funding and Maintenance of Accounts chungchang a zirtir bawk a. Zawhna leh chhanna leh sawi hona hun hman a ni bawk.

Lunglei Municipal Council hnuaiah hian ward 11 awmin, local council 24 a awm bawk a ni.