4605/2024-2025

Champhai, 11th March 2025: Vawiin khan Champhai District Agriculture Marketing Committee chu an Chairman, Bawrhsap Pu Mohammad Aqquib a hovin an ṭhukhawm a. Champhai District chhunga sawhthing lei tawh dan leh lei hmabak dinhmun te an thlirho a, sawhthing chhung khawmna hmun - Secondary Collection Centre (SCC) vil tur Nodal Officer leh Supervisor-te an ruat bawk a ni.

Ṭhutkhawm a tarlan danin Champhai District chhunga Secondary Collection Centre 10 aṭangin Sawhthing kg 369,811.778 - cheng vaibelchhe 1.84 (₹1,84,90,589) man leikhawm tawh a ni a, pawisa hi loneitu mi 713 te hnenah Direct Benefit Transfer hmanga pek chhuah tawh a ni. Tun dinhmunah SCC 8 ah sawhthing kg 481,284 dah khawm mek a ni a, heng sawhthing man te hi pe chhuak thuai tura hmalak mek a ni.

Vawiin DAMC ṭhutkhawmah hian SCC viltu tur Nodal Officer leh Supervisor te ruat fel an ni a. Heng mi te hian, SCC enkawltu tur Manager leh Accountant te zirtirna an pe bawk ang. Champhai District chhunga sawhthing thar chhuah leitu tur te dinhmun leh an harsatna te sawiho a ni bawk.

Vawiin ṭhutkhawmah hian DAMC Member - PD, DAH&VO, LRS&WC, DAO, DFDO, DSO, DCO, DIPRO, BDO Khawbung leh Champhai te an tel a ni.