4604/2024-2025
Lawngtlai, 11th March 2025: Vawiin khan Mizoram State Commission for Women leh Child Development Project Officer, Lawngtlai bultumin ' Legal Awareness Programme on Laws related to Women & Health and Nutrition' chu LADC Hall, Council Vengah neih a ni.
Pi Vanlalhlupuii Fanai, Member, Mizoram State Commission for Women, chuan kalkhawmte chibai bukna a nei hmasa a. India sawrkarin hmeichhiate hamthatna a ngaipawimawh hle a, National Commision for Women din hialin, Mizoramah pawh ni 11, August, 1998 khan Mizoram State Commission for Women chu din ve a ni, a ti. Mizoram State Commission for Women hmalakna hrang hrang tarlanna neiin Pi Vanlalhlupuii chuan Constitution leh dan hrang hrang hnuaia hmeichhiate venhimna leh humhalhna kawngah theihtawp chhuah a nih thin thu a tarlang. Hmeichhiate dinhmun leh dikna chanvo humhalh kawngah sawrkara report an pek thin thu a sawi bawk.
Eizawnna kawnga Hmeichhiate dawm kan bakah jail, observation home, civil hospital leh hmeichhe awmna tur bika siam an tlawh thin thu a sawi a. Mizoram chhunga hmeichhiate awm dan leh nunphung an thlithlai reng thin thu a tarlang. Pi Vanlalhlupuii chuan Mizoram State Commission for Women hmalaknaa 'Legal Awareness Campaign' kalpui thin a nih thu sawiin, hei hian a tum ber chu hmeichhiaten dan an hriatchianna tura hmlalakna a ni, a ti. Hmeichhiate humhalhna kawngah Mizoram State Commission for Women chuan theihtawp a chhuah mek thu leh a chhuah chhunzawm zel tur thu a sawi a. Pi Vanlalhlupuii chuan Sawrkarin hmeichhiate hamthatna a pek chu hrechiang tura chahin, harsatna an neih kawngah Mizoram State Commission for Women pan fo thin turin a sawm nghal bawk.
Pu St. Ramhmachhuanmawia, Advocate & Legal Consultant chuan dan pawimawh tak tak 'Constitutional Safeguards of Women under New Laws- India Danpui leh Hmeichhiate, Criminal Law leh Hmeichhiate, Bharatiya Nyaya Sanhita (BNS) 2023, The Lai Autonomous District Council (Inheritance of Property) Act, 2019 leh The Lai Autonomous District Council (Marriage and Dovorce) Act, 2019 hmangin zirtirna hun a hmang a. Pi F. Lalengvari, Protection Officer, DHEW( WCD) chuan 'Protection of Women under Various Laws' tih thupui hmangin 'Sexual Harrasment of Women at Workplace ( Prevention, Prohibition and Redressal ) Act, 2013' leh 'Protection of Women from Domestic Violence Act, 2005' tih hmangin zirtirna a pe a. Pi Vanlalruati, SMS, (Home Science) KVK chuan thutawi sawina nei bawkin zawhna leh chhanna hun an hmang nghal a ni.
Vawiin hun hmannaah hian sawmbik mi thahnem tak an kal thei a, Pi Lalthlamuani Rokhum, CDPO, Lawngtlai chuan kalkhawmte lawmna thu sawiin, Pi Rosy Biakthankungi, Circle Officer (WCD) chuan lawmthu sawina neiin hun a khar.
