262/2025-2026

Champhai, 22nd April 2025: Champhai District High School & Higher Secondary School Sports chu vawiin khan Champhai District Bawrhsap Pu Mohammed Aaquib chuan Chhangphut Field-ah a hawng a. He hunah hian damdawi leh mipat hmeichhiatna hmansualna bakah HIV/AIDS leh STI chungchang inzirtirna neih nghal a ni bawk. 

Khuallian Pu Mohammed Aaquib chuan Mizo culture-ah infiamna a beh tlat thu sawiin, infiamna chu hriselna nena inzawm tlat anih angin mi tam zawkin he lam kawng zawh thei se a duh thu a sawi a. Taksa hriselna atan pawh insawizawi kan uar chhoh zel a pawimawh thu a sawi bawk a ni. 

Bawrhsap chuan zirlaite chu nih tum nghet tak nei turin a chah a, an tum ram an panna kawngah theihtawp chhuah zel turin a chah bawk. Hlawhtlinna hi theihtawp chhuah hnuah chauh neih theih a ni a, hlawhtling tur chuan kan tum ram thleng turin a tawp kan thlen peih a ngai a ni, a ti a. Bawrhsap chuan zirlaite chu an nih tum engpawh ni thei tura an kalna kawngah mi hlawhtling tawh te entawn nachang hre turin a chah bawk a ni.

Pu Mohammad Aaquib chuan ruihhlo tichhin lo turin zirlaite a chah a, tihchhin tawh chuan bansan leh mai mai theih a nih tawh loh avangin tih chhin loh phawt a that thu a sawi a ni.  Ruihhlo chu zirna kawnga chhiatna thlentu, an tum ram an panna kawnga hlawhchhamna thlentu a ni tih hre reng turin a chah a, sports an neihna turah duhsakna sang ber a hlan nghal bawk a ni. 

He hun hi Pi K. Lalsiamliani, DEO chuan kaihruaiin Pu T. Lalnunsanga, Councellor cum Manager, Sampurna Suraksha Kendra hnen atangin damdawi leh mipat hmeichhiatna hmalsualna bakah HIV/AIDS leh STI kai theih dan te ngaihthlak a ni a. Pu Ramengmawia kaihhruainain ruihhlo leh mipat hmeichhiatna hmangsual lo turin zirlaite hian thutiam an la a ni.

Champhai District High School & Higher Secondary School Sports-ah hian School 19 an tel thei a, heng school 19 te hian Football, Volleyball, inhruipah leh inkawibah hmangin an intihsiak dawn a. Chhangphut Field, Zotlang Sports Stadium, Kahrawt Field leh DEO Field ah te khelh thin a ni ang.