3248/2023-2024

Champhai the 6^th January, 2024 – Special Summary Revision of Photo Electoral Roll, 2024 hmalakna kal zelah vawiin khan Assembly Constituency pathum awmna Champhai District Draft Electoral Roll, 2024 chu Champhai DC leh District Election Officer ni bawk Pu James Lalrinchhana chuan Champhai DC Conference Hall, Keifangtlang-ah a tlangzarh.

Special Summary Revision of Electoral Roll neih mekah hian 01.01.2024 chu tehfunga hman a ni a, Final Electoral Roll hi February ni 8, 2024 ah tlangzarh tur niin, he Roll hi kumin Lok Sabha Election neih turah hman a ni dawn a ni.

Champhai DC & DEO Pu James Lalrinchhana chuan Champhai District-ah h harsatna lian tham thleng lova boruak muanawm tak hnuaia MLA Election, 2023 chu hlawhtling taka zawhfel a ni chu lawmawm tiin, inthlan hlawhtlinna tura theihtawp chhuaha rim taka thawktu official-te, khawtlang hruaitute, NGO-te, Media-te leh political party te chungah lawmthu a sawi a. Champhai District Draft Electoral Roll, 2024 a hun taka peih fel tura buaipuitu election branch official-te chungah lawmthu a sawi bawk a ni. India khua leh tui vote nei thei chin kan nih chuan vote thlak hi kan dikna chanvo leh kan mawhphurhna pawimawh tak a ni tiin, kum tling tharte leh midang roll a hming la thun lut lo te pawh he Summary Revision hun chhung hian inziak lut ngei turin a sawm a. Kan hma lawka General Election to Lok Sabha, 2024 kan hmachhawn tur chu a hlawhtlin ngei theihnan Electoral Roll dik leh felfai tak kan neih a tul hmasa a ni tiin, Draft Roll publish tak chu mipuite pawhin uluk taka lo zirchiangin, an hming, address leh particular dangte a dik ngei em tih lo finfiah theuh turin District mipuite a sawm a ni.

Champhai Election Officer Pu Benjamin Zalawma Ralte chuan Champhai District Draft Electoral Roll chungchang report tlangpui a pe a.

Vawiin Draft Electoral Roll tlangzarh anih atang hian roll a luh dilna leh tih danglam dilna (Filing of claims and objections) chu hawn nghal niin January ni 22, 2024 (Monday) thleng hawn a ni a. January ni 1, 2024 leh a hma lama kum 18 tling hman te tan electoral roll a luh dilna hi a thehluh theih a ni. General Election to Lok Sabha, 2024 a hman tur Electoral Roll Final Publication chu February ni 8, 2024 (Thursday) ah neih a ni ang.

State Election Commission, Mizoram Notification dated January ni 4, 2024 in a tarlan angin VC Bye Election chu January ni 30, 2024 (Tuesday) ah neih a ni dawn a. Champhai District-ah Seat pakhat Zion Veng Reserved Seat atan Bye Election neih tur niin, hemi atan hian Returning Officer, Presiding Officer te ruat fel tawh niin, training te pek tawh an ni a, ruahmanna tha taka kalpui mek a ni.

Champhai District Draft Electoral Roll, 2024 tlangzarhna, DC Conference Hall Keifangtlanga neihah hian election kawihhnawih sawrkar official-te, Champhai MJA hruaitute leh political party aiawhte an tel a ni.