Vawiin chawhnu dar 1 khan DC Conference Hall, Keifangtlangah District AIDS Prevention and Control Committee (DAPCC) chu an Chairman Champhai DC Pu Vanlalngaihsaka IAS hovin an thu khawm a. Champhai Bawrhsap chuan Champhai a medical staff te leh a bik takin District AIDS Prevention and Control Unit (DAPCU) ten  AIDS dona leh tihrem kawnga District tana an hnathawh chu fakawm a tih thu a sawi.

Thukhawm chuan October ni 25,2017-a Meeting  thurel bawhzui anih dante thlirletna neiin Pi C.Lalruatfeli, District Programme Manager, DAPCU hnen atangin hmalak tawhna leh hmalak zelna turte ngaihthlak  a ni a. Champhai District chhunga HIV/AIDS dinhmun tlangpui thlirhona leh hmalak zel dan tur sawihona neih a ni a.

District AIDS Prevention and Control Unit (DAPCU) ten Drop in Centre-a inziaklut  Syringe hmanga inchiu thinte  zirchianna nikum November leh December thla chhunga an neih atanga Presentation an buatsaih ‘Epidemiology of HIV/AIDS among IDUs registered at Dropping Centre’ tih chu Pi C.Lalruatfeli, District Programme Manger, District AIDS Prevention and Control Unit (DAPCU) in a pe a. Zirchianna in a tarlan dan chuan inchiuna vanga HIV kaite hi lehkhazir sanglo, a tamber chu mipa niin kawppui neilo an ni deuh ber a. Drugs addict-te hi a tlangpuiin School drop out, naupang lam kum 14 atanga 23 inkar an tam hle a, hei hian Zirna In-a awareness kalpui a tul takzet a ni tih a tilang a ni. Damdawi hmang sual tam zawkte hi nitina inhlawhfate an ni hlawm a ni. Han tihchhin ve hrim hrim chakna vanga damdawi addict ta an tam ber a. Heng damdawi addict-te zinga a zahve dawn hi chhungte ngaihsakna dawng lemlote an ni bawk a ni. Syringe thianghlimlo hman pawlh avanga HIV kai  tam berin inkaichhawn theih a ni tih erawh chu a tam zawkin an hre thung a ni. Zirchiante zinga za zela 86 te chu ART ah an in register a ni. A tlangpuiiin ni khatah vawi 1 atanga vawi 3 inchiu an tam ber a, an zinga za zela 55 te chu vawi khat thisen test-a HIV positive an ni tih hmuhchhuah a ni bawk.   

ART Centre atanga ART Data tlangpui Dr Samuel Laldinthara, MO ART Centre Champhai  hnen atanga ngaihthlak a ni a. ART Centre Champhai hi December 2010 a bul tan kha niin CD 4 Machine hi January 2015 ah khan bunfel a lo ni tawh bawk a ni. Tun thlengin mi 1475 in register tawhin heng zinga mi 1080 ten ART an la tawh  a ni. Tun January thla thleng khan mi 814 ten ART hi an la mek a ni. April 2017 a dan thar siam tak ‘Test and Treat’ hmangin HIV vei reng rengte chu an CD 4 Count behchhan tawh lovin direct-a ART pek thin an ni tawh zawk a ni.

HIV hluar lam tehna HIV Sentinel Surveillance (HSS),December 2017 a neihin a tarlan dan chuan Nu naupai (Ante Natal Clinic, ANC)  za zela 1.19 in HIV an vei a, hei hi India ram pum average za zela 0.28 ai pawhin a sang zawk a ni. ANC hi rampuma HIV san leh  san loh tehfung bera hman a ni. Heng bakah hian Damdawi ruih nana inchiu thin Injecting Drug Users (IDU) zinga za zela  19.8 leh Hmeichhe inzuar thin Female Sex Worker te zinga za zela 24.7 te chuan HIV natna hi an vei mek a chhut a ni bawk.

Meeting chuan a tam thei ang ber HIV/AIDS chungchangah inhrilhhriatna neih nise a ti a. Hemi tur hian line department hrang hrang, Media, NGO leh khawtlang hruaitute thawkho zel tura hmalak nise a ti a.

DPCC Meeting-ah hian Champhai khawpui chhunga Line department hrang hrang aiawh, Dropping centre-a thawktute, NGO leh khawtlang hruaitute   an tel a ni.